அரசு விரைவு பேருந்துகள் நாளை முதல் இயக்கம்:ஓட்டுநர் ,நடத்துனர்களுக்கு போக்குவரத்து கழகம் அறிவுறுத்தல்

அரசு பேருந்துகள் நாளை முதல் அனைத்து வெளிமாவட்டங்களில் இயங்கவுள்ள நிலையில் ஓட்டுநர் மற்றும் நடத்துனர்களுக்கு அரசு விரைவு போக்குவரத்துக்கழகம் அறிவுரை வழங்கி வருகிறது.

சென்னை:

தமிழகத்தில் கடந்த 1ம் தேதி முதல் மாவட்டத்துக்குள் மட்டுமே பேருந்து சேவை இயக்கப்பட்டு வருகிறது. இந்த நிலையில் மாவட்டங்களுக்கு இடையே பேருந்து இயக்கப்பட வேண்டும் என பொதுமக்கள் கோரிக்கை வைத்தனர். அதைத் தொடர்ந்து வருகிற 7 ம் தேதி முதல் மாவட்டங்கள் இடையே அரசு மற்றும் தனியார் பஸ்கள் இயக்கப்படும் என்று முதலமைச்சர் எடப்பாடி பழனிசாமி அறிவித்தார்.

தனியார் ஆம்னி பேருந்துகளின் உரிமையாளர்கள் சங்கம் சாலை வரி ரத்து உள்ளிட்ட கோரிக்கைகளை நிறைவேற்றி தந்தால் மட்டுமே ஆம்னி பேருந்துகளை இயக்க உள்ளதாக தெரிவித்தனர். எனவே தற்போது உள்ள சூழ்நிலையில் அரசு பேருந்துகளை மட்டுமே பொதுமக்கள் நம்ப வேண்டிய கட்டாயம் ஏற்பட்டுள்ளது. முதலமைச்சர் உத்தரவைத் தொடர்ந்து வெளியூர் செல்லும் பேருந்துகளின் பராமரிப்பு மற்றும் சீரமைப்பு பணி மேற்கொள்ளப்பட்டும், பேருந்துகளின் உள்ளே மற்றும் வெளியேயும் கிருமிநாசினி தெளிக்கும் பணி முழுவீச்சில் நடந்துவருகிறது.

தமிழகத்தில் 1,184 அரசு விரைவு பேருந்துகள் உள்ளது . இதில் முதல் பகுதியாக 524 அரசு விரைவு பேருந்துகள் வருகிற 7 ம் தேதி முதல் இயக்கப்பட இருக்கின்றன. இந்த விரைவு பேருந்துகளுக்கான டிக்கெட் முன்பதிவு நேற்று முன்தினம் தொடங்கியதுதொடர்ந்து முதல் நாளிலேயே 3 ஆயிரத்துக்கும் மேற்பட்டோர் முன்பதிவு செய்துள்ளனர்.

தமிழக அரசு விரைவு போக்குவரத்து கழகம் மூலம் சென்னை, திருச்சி, திருநெல்வேலி, மதுரை, கோவை, திருப்பூர், தஞ்சாவூர் உள்ளிட்ட இடங்களுக்கு பேருந்துகள் இயக்கப்பட உள்ளன. வெளிமாவட்டங்களுக்கு அரசு பேருந்துகளை இயக்க உள்ள ஓட்டுநர்களுக்கு தமிழ்நாடு அரசு விரைவு போக்குவரத்துக்கழகம் அறிவுறிவுரைகளை வழங்கி வருகிறது.

அதில், கடந்த ஐந்து மாதங்களாக இரவில் ஓய்வில் இருந்ததால் இரவு நேரங்களில் பேருந்துகளை ஓட்டுநர்கள் கவனமாக இயக்க வேண்டும். நள்ளிரவு- காலை 04.00 மணி வரை நடத்துனர்கள் இருக்கையில் அமர்ந்து ஓட்டுநர்களுக்கு விழிப்புணர்வு ஏற்படுத்த வேண்டும்.மேலும் வழித்தடங்களில் இரு சக்கர வாகனங்கள் அதிகம் இயக்கப்படுவதால் கவனமாக பணிபுரிய வேண்டும்.என்றும் நகரில் போக்குவரத்து நெரிசல், வேகத்தடை இருப்பதால் ஓட்டுநர்கள் கவனமுடன் பணிபுரிய வேண்டும் என்று தெரிவிக்கப்பட்டுள்ளது.