மாணவர்களுக்கு ஆண்டுக்கு ரூ.12,000; விண்ணப்பிக்க அவகாசம் நீட்டிப்பு!

மாணவர்களுக்கு ஆண்டுக்கு ரூ.12,000; விண்ணப்பிக்க அவகாசம் நீட்டிப்பு!

புதுடெல்லி: தேசிய வருவாய் வழி மற்றும் திறனறித் தேர்வு உதவித்தொகைத் திட்டத்தின்கீழ், 2026–27 கல்வியாண்டுக்கான விண்ணப்பங்களைச் சமர்ப்பிப்பதற்கான காலக்கெடுவை அக்டோபர் 31-ஆம் தேதி வரை மத்திய கல்வி அமைச்சகம் நீட்டித்துள்ளது.

பொருளாதாரத்தில் பின்தங்கிய குடும்பங்களைச் சேர்ந்த திறமையான மாணவர்கள் 8-ஆம் வகுப்புக்குப் பிறகு படிப்பைக் கைவிடாமல், 12-ஆம் வகுப்பு வரை கல்வியைத் தொடர உதவுவதே இந்தத் திட்டத்தின் நோக்கமாகும்.

ஆண்டுக்கு ரூ.12 ஆயிரம்

இந்தத் திட்டத்தின்கீழ் தேர்வு செய்யப்படும் மாணவர்களுக்கு ஆண்டுக்கு ரூ.12 ஆயிரம் உதவித்தொகை வழங்கப்படும். மாணவர்களின் வங்கிக் கணக்கில் நேரடி பணப் பரிமாற்ற முறையில் இந்தத் தொகை செலுத்தப்படும்.

ஒவ்வொரு ஆண்டும் மாநில மற்றும் யூனியன் பிரதேச அரசுகள் நடத்தும் தேர்வில் தகுதிபெறும் ஒரு லட்சம் 9-ஆம் வகுப்பு மாணவர்களுக்குப் புதிதாக உதவித்தொகை வழங்கப்படுகிறது. நிர்ணயிக்கப்பட்ட கல்வித் தகுதிகளைப் பூர்த்தி செய்தால், 10 முதல் 12-ஆம் வகுப்பு வரை உதவித்தொகையைப் புதுப்பித்துக்கொள்ளலாம்.

யார் தகுதியானவர்கள்?

மாநில அரசு, அரசு உதவிபெறும் பள்ளிகள் மற்றும் உள்ளாட்சி அமைப்புகள் நடத்தும் பள்ளிகளில் படிக்கும் மாணவர்கள் இந்தத் திட்டத்தின் கீழ் பயன்பெறலாம். விண்ணப்பதாரரின் பெற்றோரது மொத்த ஆண்டு வருமானம் ரூ.3.50 லட்சத்துக்கு மிகாமல் இருக்க வேண்டும்.

உதவித்தொகைக்கான தேர்வை எழுத, மாணவர்கள் 7-ஆம் வகுப்பில் குறைந்தது 55 சதவீத மதிப்பெண் அல்லது அதற்கு இணையான கிரேடு பெற்றிருக்க வேண்டும். எஸ்.சி., எஸ்.டி. மாணவர்களுக்கு ஐந்து சதவீத மதிப்பெண் தளர்வு வழங்கப்படும்.

மாநில அரசு நடத்தும் உதவித்தொகைத் தேர்வில் ஏற்கெனவே தகுதிபெற்ற புதிய மாணவர்களும், தற்போது உதவித்தொகை பெற்று வரும் மாணவர்களும் விண்ணப்பத்தைப் புதுப்பிக்க வேண்டும்.

விண்ணப்பிப்பது எப்படி?

மாணவர்கள் தேசிய உதவித்தொகை இணையதளத்தில் முதலில் ஒருமுறைப் பதிவு எனப்படும் ‘OTR’ நடைமுறையை நிறைவுசெய்ய வேண்டும். அதன்பிறகு தேசிய வருவாய் வழி மற்றும் திறனறித் தேர்வு உதவித்தொகைத் திட்டத்தைத் தேர்ந்தெடுத்து விண்ணப்பிக்கலாம்.

மாணவர்களின் விண்ணப்பங்களைப் பள்ளி அல்லது கல்வி நிறுவனத்தின் பொறுப்பு அலுவலர் நவம்பர் 15-ஆம் தேதிக்குள் சரிபார்க்க வேண்டும். மாவட்டப் பொறுப்பு அலுவலரின் இரண்டாம் கட்டச் சரிபார்ப்புக்கு நவம்பர் 30-ஆம் தேதி கடைசி நாளாகும்.

ஏற்கெனவே விண்ணப்பித்த மாணவர்கள், தங்கள் விண்ணப்பம் பள்ளி மற்றும் மாவட்ட அளவில் சரிபார்க்கப்பட்டுள்ளதா என்பதை உறுதிசெய்துகொள்ள வேண்டும் என மத்திய கல்வி அமைச்சகம் அறிவுறுத்தியுள்ளது.

Related Articles

Leave a Reply

Your email address will not be published. Required fields are marked *