HDFC Bank CEO சஷிதர் ஜகதீஷன் விலகுகிறார்; அக்டோபர் 26-ல் ஓய்வு!

மீண்டும் நியமிக்க வேண்டாம் என வாரியத்திடம் விருப்பம்;
புதிய CEO-வை தேர்வு செய்யும் பணியை விரைவுபடுத்துகிறது HDFC Bank

நாட்டின் மிகப்பெரிய தனியார் வங்கியான HDFC Bank⁠-ன் நிர்வாக இயக்குநர் மற்றும் தலைமைச் செயல் அதிகாரி சஷிதர் ஜகதீஷன், தனது தற்போதைய பதவிக்காலம் முடிவடைந்ததும் மீண்டும் அப்பதவிக்கு நியமிக்கப்பட விரும்பவில்லை என்று தெரிவித்துள்ளார். இதையடுத்து வரும் அக்டோபர் 26-ஆம் தேதி வங்கிப் பணியிலிருந்து அவர் ஓய்வு பெறுகிறார்.

ஜகதீஷன் தனது முடிவை வங்கியின் இயக்குநர் குழுவிடம் சனிக்கிழமை தெரிவித்தார். அவர் தொடர்ந்து பதவியில் இருக்க வேண்டும் என்று வாரியம் வலியுறுத்தியபோதும், மீண்டும் நியமனம் வேண்டாம் என்ற தனது முடிவில் அவர் உறுதியாக இருந்ததாக HDFC Bank பங்குச் சந்தைக்கு அளித்த தகவலில் தெரிவித்துள்ளது.

அக்டோபர் 26 கடைசி நாள்

சஷிதர் ஜகதீஷனின் தற்போதைய பதவிக்காலம் 2026 அக்டோபர் 26 அன்று முடிவடைகிறது. அன்றைய வங்கிப் பணிநேரம் முடிவடைந்ததும் HDFC Bank சேவையிலிருந்து அவர் ஓய்வு பெறுவார். இதன்மூலம் HDFC வங்கி உடனான அவரது சுமார் மூன்று தசாப்த காலப் பயணமும் முடிவுக்கு வருகிறது. ஜகதீஷன் 2020-ல் HDFC Bank-ன் MD & CEO ஆக நியமிக்கப்பட்டார். 2023-ல் அவருக்கு மேலும் மூன்று ஆண்டுகளுக்கு பதவி நீட்டிப்பு வழங்கப்பட்டது.

புதிய CEO யார்?

ஜகதீஷனின் முடிவைத் தொடர்ந்து அவரது வாரிசைத் தேர்வு செய்யும் நடவடிக்கையை விரைவுபடுத்த HDFC Bank வாரியம் முடிவு செய்துள்ளது. புதிய MD & CEO-வை தேவையான காலக்கெடுவுக்குள் தேர்வு செய்து நியமிக்கும் செயல்முறை fast-track செய்யப்படும் என்று வங்கி தெரிவித்துள்ளது. துணை நிர்வாக இயக்குநர் Kaizad Bharucha வங்கியின் மூத்த நிர்வாகிகளில் ஒருவராக இருப்பதால் உள்நிலை வாரிசுக்கான முக்கிய பெயராக பார்க்கப்படுவதாக Economic Times தெரிவித்துள்ளது. இருப்பினும், அடுத்த CEO யார் என்பதை HDFC Bank இதுவரை அதிகாரப்பூர்வமாக அறிவிக்கவில்லை.

மிகப்பெரிய இணைப்பை வழிநடத்தியவர்

ஜகதீஷனின் ஆறு ஆண்டு CEO பதவிக்காலத்தில் நடைபெற்ற மிக முக்கியமான நிகழ்வுகளில் ஒன்று HDFC Ltd–HDFC Bank இணைப்பு. 2023-ல் நடைமுறைக்கு வந்த இந்த மிகப்பெரிய நிறுவன இணைப்பை வெற்றிகரமாக நிறைவு செய்வதில் ஜகதீஷன் வகித்த பங்கை HDFC Bank வாரியம் தனது அறிக்கையில் குறிப்பிட்டு பாராட்டு தெரிவித்துள்ளது. வங்கியின் வளர்ச்சி மற்றும் நிலைத்தன்மைக்கும் அவர் குறிப்பிடத்தக்க பங்களிப்பு செய்ததாக வாரியம் தெரிவித்துள்ளது.

பின்னணியில் நிர்வாக சர்ச்சைகள்

ஜகதீஷனின் முடிவு HDFC Bank-ன் corporate governance தொடர்பான விவகாரங்கள் கவனம் பெற்றிருந்த காலகட்டத்தில் வந்துள்ளது. கடந்த மார்ச் மாதம் அப்போதைய HDFC Bank பகுதி நேரத் தலைவர் அதானு சக்ரவர்த்தி, வங்கியுடனான “values and ethics” தொடர்பான கருத்து வேறுபாடுகளை குறிப்பிட்டு பதவி விலகினார். அந்த திடீர் முடிவு முதலீட்டாளர்களிடையே கவலையை ஏற்படுத்தியது. பின்னர் முன்னாள் நிதித்துறை செயலாளரும் முன்னாள் தலைமைத் தேர்தல் ஆணையருமான ராஜீவ் குமார் HDFC Bank-ன் பகுதி நேரத் தலைவராக நியமிக்கப்பட்டார். இந்தப் பின்னணியில் ஜகதீஷன் மீண்டும் CEO பதவியை நாடமாட்டேன் என்று அறிவித்திருப்பதால், இந்திய வங்கித் துறையில் HDFC Bank-ன் அடுத்த தலைமை யார் என்ற எதிர்பார்ப்பு அதிகரித்துள்ளது.