பையன் பண்ணின தப்புக்கு அப்பாவை வறுத்தெடுத்த கங்கனா!

போதைப்பொருள் பயன்படுத்திய விவகாரத்தில் ஆர்யன்கான் கைது செய்யப்பட்டுள்ள நிலையில், அவரது தந்தை பாலிவுட் நடிகர் ஷாருக்கான் மன்னிப்பு கேட்க வேண்டும் என சக நடிகை கங்கனா ரனாவத் மறைமுகமாக தாக்கி பேசியுள்ளார்.

மும்பையில் இருந்து கோவா செல்லும் சொகுசு கப்பல் ஒன்றில் தடை செய்யப்பட்ட போதை பொருட்களை பயன்படுத்தி பார்ட்டி நடக்க இருப்பதாக போதைப் பொருள் தடுப்பு பிரிவினருக்கு ரகசிய தகவல் கிடைத்தது. இதைத் தொடர்ந்து, அந்த சொகுசு கப்பலில் நடத்தப்பட்ட சோதனையில், போதைப் பொருட்களை பயன்படுத்திய 8 பேர் கைது செய்யப்பட்டனர். அவர்களில் நடிகர் பாலிவுட்டின் முடிசூடா மன்னனான ஷாருக்கான் மகன் ஆர்யன்கானும் ஒருவர். அவருடன் அர்பாஸ் செத் மெர்ச்சன்ட், முன்முன் தாமெக்கா உள்ளிட்ட பிரபலங்களும் சிக்கினர். இதையடுத்து, ஆர்யன்கானை கைது செய்த போலீசார், 14 நாட்கள் நீதிமன்றக் காவலில் எடுத்து விசாரித்து வருகின்றனர்.

இதனிடையே, நடிகர் ஷாருக்கான் மகனுக்கு ஆதரவாக பாலிவுட் பிரபலங்கள் பலர் குரல் கொடுத்தனர். திரைப்பட தயாரிப்பாளர் ஹன்சல் மேத்தா மற்றும் நடிகர்கள் ஹிருத்திக் ரோஷன், பூஜா பட், சுசித்ரா கிருஷ்ணமூர்த்தி ஆகியோர் ஷாருக்கான் மற்றும் அவரது மகனுக்கு ஆதரவாக கருத்துக்களை தெரிவித்து வருகின்றனர். அதே நேரத்தில் ஷாருக் கானிற்கு விளம்பர பட வாய்ப்புகளும் குறைந்துள்ளது குறிப்பிடத்தக்கது.

இந்த நிலையில், சர்ச்சை நாயகியாக வலம் வரும் நடிகை கங்கனா ரனாவத், ஷாருக்கானை மறைமுகமாக விமர்சித்துள்ளார்.

இன்ஸ்டாகிராமில் அவர் பதிவிட்டுள்ளதாவது, “நடிகர் ஜாக்கிசான், தனது மகன் போதைப் பொருள் வழக்கில் கைது செய்யப்பட்ட போது மக்கள் மற்றும் ரசிகர்களிடம் பகிரங்கமாக மன்னிப்பு கேட்டார். மேலும், மகனின் செயலுக்கு நான் வெட்கப்படுகிறேன். இது தந்தையாக எனது தோல்வி. அவரை பாதுகாக்கும் செயலில் ஈடுபடமாட்டேன் எனக் கூறியிருந்தார்,” எனக் கூறி ஜாக்கிசானின் புகைப்படத்துடன் பதிவை பகிர்ந்துள்ளார். இது பாலிவுட் திரையுலகில் பெரும் சர்ச்சையை ஏற்படுத்தியுள்ளது.

ஆர்யன்கான் கைது செய்யப்பட்டுள்ள விவகாரத்தில் ஷாருக்கான் இன்னும் அமைதி காத்து வரும் நிலையில், நடிகை கங்கனா ரனாவத்தின் பதிவு, பல்வேறு தரப்பினரிடையே பல கேள்விகளை எழுப்பியுள்ளது. மேலும், கங்கனாவின் பதிவுக்கு ஆதரவாகவும், எதிராகவும் சமூக வலைதளங்களில் கருத்துகள் எழுந்து வருகின்றன.

இதற்கு முன்னதாக சமந்தாவின் விவாகரத்து குறித்து மறைமுகமாக ஆமிர் கானை அவர் தாக்கி பேசி வம்பிற்கு இழுத்ததும் குறிப்பிடத்தக்கது.