By திரையுலகில் பல வித்தியாசமான நிகழ்வுகள் நடைபெறுவது வழக்கம். தன் மகளாக நடித்த குழந்தை நட்சத்திரம் வளர்ந்து இளம்பெண் ஆன பிறகு அவருடனே ஜோடி போட்டு நடிக்கும் கலாச்சாரம் தமிழ் சினிமாவில் சர்வசாதாரணமாக நடப்பது தான்.
அன்புள்ள ரஜினிகாந்த் படத்தில் குழந்தை நட்சத்திரமாக தன்னுடன் நடித்த மீனா என் ராசாவின் மனசிலே படத்தில் ராஜ்கிரண் உடன் கதாநாயகியாக நடித்தார். அதன்பின் சூப்பர்ஸ்டார் ரஜினிகாந்த்துக்கு ஜோடியாக பல திரைப்படங்களில் நடித்திருக்கிறார். மருமகன் தனுஷ் உடன் ஜோடியாக நடித்த ஸ்ரேயாவுடன் சிவாஜி படத்தில் ரஜினிகாந்த் ஜோடியாக நடித்துள்ளார். அமிதாப் பச்சன் மருமகளான ஐஸ்வர்யா ராயுடன் எந்திரன் திரைப்படத்தில் ஜோடி சேர்ந்தார். தன் மகன் பிரபு கதாநாயகனாக நடிக்க தொடங்கியபோது அவருடன் ஜோடியாக நடித்த அம்பிகா, ராதா ஆகியோருடன் பின்னாட்களில் ஜோடியாக சேர்ந்து நடித்துள்ளார் சிவாஜி கணேசன். ஆனால், விஜய் சேதுபதி இந்த விஷயத்தில் அதிலிருந்து மாறுபட்டு ஒரு முடிவு எடுத்துள்ளது தெலுங்கு திரையுலகில் முக்கிய செய்தியாகியுள்ளது.
தெலுங்கில் ‘உப்பெனா’ என்ற படத்தில் விஜய் சேதுபதி வில்லனாக நடித்தார். சூப்பர் ஹிட்டான அந்தப் படத்தில் கீர்த்தி ஷெட்டி என்ற அறிமுக நடிகை விஜய் சேதுபதியின் மகளாக நடித்தார். தனது முதல் படத்திலேயே அவரும் தென்னிந்தியா முழுவதும் பிரபலமானார்.
இந்நிலையில் தமிழில் விஜய் சேதுபதி நாயகனாக நடிக்க உள்ள ஒரு படத்துக்காக கீர்த்தி ஷெட்டியை அவரது ஜோடியாக நடிக்க வைக்க பேசி வைத்திருந்தார்களாம். ஆனால், அது பற்றி கேள்விப்பட்ட விஜய் சேதுபதி, தனக்கு மகளாக நடித்த நடிகையுடன் ஜோடியாக நடிக்க மாட்டேன். வேறு கதாநாயகியைப் பாருங்கள் என்று உறிதியாக சொல்லிவிட்டாராம். இதுபற்றி கேள்விபட்ட கீர்த்தி ஷெட்டி அதிர்ச்சியடைந்தார் எனவும் செய்தி வெளியாகியுள்ளது. இந்த செய்தி தெலுங்கு திரையுலகில் பரபரப்பை ஏற்படுத்தியுள்ளதாம்.
