கருப்பு பூஞ்சை வரிசையில் ஆபத்தை தரும் மஞ்சள் பூஞ்சை – மருத்துவர்கள் எச்சரிக்கை

கருப்பு மற்றும் வெள்ளை பூஞ்சயை பாதிப்பை காட்டிலும் மஞ்சள் பூஞ்சை மிகுந்த ஆபத்தான பாதிப்புகளை ஏற்படுத்துவதாக மருத்துவர்கள் தெரிவித்துள்ளனர்.

கொரோனாவின் அச்சத்தில் இருந்து மக்கள் மீள்வதற்குள் வைரஸ் பாதிப்பில் இருந்து குணமான நபர்களுக்கு கருப்பு மற்றும் வெள்ளை பூஞ்சை தொற்று பாதிப்பு பரவுவதாக செய்திகள் வெளியாகின. இதனால் பலருக்கு கண் உள்ளிட்ட உடல் உறுப்புகள் பாதிக்கப்பட்டு மரணம் வரை செல்லும் ஆபத்தான நிலை ஏற்படுகிறது. இந்த தகவல் நாடு முழுவதிலும் பெரும் அதிர்வலைகளை ஏற்படுத்தி உள்ள சூழலில் புதிதாக மஞ்சள் பூஞ்சை தொற்று இருப்பது கண்டறியப்பட்டுள்ளது.

உத்தரப் பிரதேச மாநிலம் காஸியாபாத்தில் நோயாளி ஒருவருக்கு மஞ்சள் பூஞ்சை பாதிப்பு ஏற்பட்டுள்ளது அதிர்ச்சியை அளித்துள்ளது. பாதிப்பு மிகுந்த அந்த நபர் ENT சிறப்பு சிகிச்சை நிபுணர் பிரிஜ் பால் தியாகியிடம் சிகிச்சை பெற்று வருவதாகவும் தகவல்கள் வெளியாகியுள்ளன. இந்த மஞ்சள் பூஞ்சை கருப்பு மற்றும் வெள்ளை பூஞ்சை தொற்றை காட்டிலும் மிகவும் ஆபத்தானது என்று மருத்துவர்கள் கூறுகின்றனர். இதனால் உடலின் உட்பகுதியில் பாதிப்புகள் ஏற்படுவதால் லேசான அறிகுறிகள் தென்பட்டவுடன் மருத்துவர்களின் ஆலோசனையை பெற வேண்டும் என்று நிபுணர்கள் கூறுகின்றனர்.

அறிகுறிகள்:

சோம்பல், குறைந்த அளவு பசி, பசியின்மை, எடை இழப்பு ஆகும். மிகத் தீவிர பாதிப்பு ஏற்பட்டவர்களுக்கு ஊட்டச்சத்து குறைபாடு, உடலில் காயங்கள் இருந்தால் மெதுவாக ஆறுதல், உடல் உறுப்புகள் செயலிழப்பது, கண்களைச் சுற்றி கருமை நிறம் அடைதல் உள்ளிட்ட பிரச்சினைகள் ஏற்படும்.

நோய்க்கான காரணங்கள்:

சுகாதாரமற்ற நிலை தான் மஞ்சள் பூஞ்சை தொற்று பரவுவதற்கு முக்கிய காரணமாக உள்ளது. இதனால் வீட்டை அடிக்கடி சுத்தம் செய்ய வேண்டியது அவசியம். சுற்றுப்புறத்தையும் தூய்மையாக வைத்திருக்க வேண்டும். வீட்டில் ஈரப்பதமான சூழல் முக்கியம். அதுவே அளவுக்கு அதிகமாக போய்விட்டால் பாக்டீரியா, பூஞ்சை வளர காரணமாக அமைந்துவிடும். வீட்டில் நீண்ட நாட்களாக வைத்திருக்கும் உணவுப் பொருட்களை உடனே தூக்கி எறிய வேண்டும்.

சிகிச்சை:

மஞ்சள் பூஞ்சை பாதிப்பு ஏற்பட்ட நபர்களுக்கு இருக்கும் ஒரே சிகிச்சை முறை Amphotericin B என்ற ஊசி போட்டுக் கொள்வது தான் ஆகும். இது பூஞ்சைகளுக்கு எதிரான மருத்துவத் தன்மை கொண்டது.