புத்தாண்டு கொண்டாட்டத்துக்குக் கட்டுப்பாடு: கடற்கரைகளுக்குச் செல்ல தமிழக அரசு தடை

புத்தாண்டு கொண்டாட்டத்தை முன்னிட்டு கடற்கரைகளுக்குச் செல்ல தமிழக அரசு தடை விதித்துள்ளது.

நாளையுடன் ஏற்கனவே அமலில் உள்ள ஊரடங்கு முடிவடைய உள்ள நிலையிலும், கொரோனா திரிபான ஒமிக்ரான் பரவலைக் கட்டுப்படுத்தும் வகையிலும், தமிழகத்தில் ஊரடங்கை நீட்டிப்பது தொடர்பாகவும் முதல்வர் ஸ்டாலின் தலைமையில் நேற்று (டிசம்பர் 13) ஆலோசனைக் கூட்டம் நடைபெற்றது. இதில் கிறிஸ்துமஸ், புத்தாண்டு உள்ளிட்ட பண்டிகை காலங்களில் கொரோனா பரவலைக் கட்டுப்படுத்த முக்கிய முடிவுகள் எடுக்கப்பட்டன.

அதன்படி, கொரோனா – ஒமிக்ரான் வைரஸ் நோயைக் கருத்தில்கொண்டும், பொதுமக்கள் நலன் கருதியும் நடைமுறையில் உள்ள ஊரடங்கு கட்டுப்பாடுகள் 31.12.2021 வரை நீட்டித்து உத்தரவிடப்பட்டுள்ளது.

மேலும், பண்டிகைக் காலங்களில், பொதுமக்கள் ஒரே நேரத்தில், ஒரே இடத்தில் கூட்டம் கூடுவதால் கொரோனா நோய்த் தொற்று பரவல் அதிகரிக்க வாய்ப்புள்ளதாக மருத்துவ வல்லுநர்கள் தெரிவித்துள்ளதைக் கருத்தில்கொண்டு சில கட்டுப்பாடுகள் விதிக்கப்பட்டுள்ளது.

சமுதாய, கலாச்சார, அரசியல் கூட்டங்கள் போன்ற பொதுமக்கள் கூடும் நிகழ்ச்சிகளுக்குத் தற்போது நடைமுறையிலுள்ள தடை தொடர்கிறது.

கொரோனா நோய்த் தொற்று பரவலைக் கட்டுப்படுத்தும் வகையில் 31.12.2021 மற்றும் 1.1.2022 ஆகிய நாட்களில் அனைத்து கடற்கரைகளிலும் பொது மக்களுக்கு அனுமதி இல்லை.

ஏற்கெனவே அனுமதிக்கப்பட்டுள்ள செயல்பாடுகள் உரியக் கட்டுப்பாடுகளுடன் தொடர்ந்து அனுமதிக்கப்படும். மேலும், பின்வரும் செயல்பாடுகள், நிலையான வழிகாட்டு நடைமுறைகளைப் பின்பற்றிச் செயல்பட அனுமதி அளிக்கப்படுகிறது.

அனைத்து நீச்சல் குளங்களும் செயல்பட அனுமதிக்கப்படும்.

அனுமதிக்கப்பட்ட செயல்பாடுகள் அனைத்திற்கும் கூட்ட அரங்குகள் பயன்படுத்த அனுமதிக்கப்படும்.

தமிழ்நாட்டில் நடைமுறைப்படுத்தப்பட்டிருந்த ஊரடங்கின் காரணமாகப் பல மாதங்களாகப் பள்ளிகளுக்குச் செல்லாததால் மாணவர்களிடையே கற்றல் திறன் குறைந்துள்ளதையும், மாணவர்களின் எதிர்காலத்தைக் கருத்தில்கொண்டும், 03.01.2022 முதல் அனைத்து உயர்நிலை / மேல்நிலைப் பள்ளிகள் (6ஆம் வகுப்பு முதல் 12ஆம் வகுப்பு வரை மட்டும்), அனைத்து கல்லூரிகள் மற்றும் தொழில்நுட்ப பயிற்சி நிறுவனங்கள் சுழற்சி முறை இன்றி இயல்பாகச் செயல்படும்” என்று தமிழக அரசு அறிவிப்பு வெளியிட்டுள்ளது.

சுழற்சி முறை வகுப்பில் மாணவர்கள் 50 சதவிகிதம் பேர் மட்டுமே வகுப்பறையில் இருந்து பாடங்களை கவனித்து வந்தது குறிப்பிடத்தக்கது.