எஸ்.பி.பி.ஆ..எஸ்.ஆர்.பி. ஆ?.. இரங்கல் செய்தியில் அதிர்ச்சி அளித்த செல்லூர் ராஜு

மறைந்த பாடகர் எஸ்.பி.பிக்கு பதிலாக, அதிமுக சார்பில் மாநிலங்களவை எம்பி எஸ்.ஆர்.பாலசுப்பிரமணியம் இறந்ததாக, அமைச்சர் செல்லூர் ராஜூ இரங்கல் தெரிவித்த சம்பவம் பரபரப்பை ஏற்படுத்தியது.

திண்டுக்கல் மாவட்ட ஆட்சியர் அலுவலகத்தில் கூட்டுறவுத்துறை செயல்பாடுகள் குறித்த ஆய்வுகள் தொடர்பான கூட்டத்தில், அமைச்சர் செல்லூர் ராஜூ கலந்து கொண்டார். பின்னர், செய்தியாளர்களை சந்தித்த அவரிடம், பின்னணி பாடகர் எஸ்.பி.பி மறைவு குறித்து கேள்வி எழுப்பப்பட்டது. அதற்கு பதிலளித்த செல்லூர் ராஜு, பாடகர் எஸ்.பி.பாலசுப்பிரமணியம் இறந்ததற்கு பதிலாக, அதிமுக சார்பில் தற்போது மாநிலங்களவை எம்பியாக உள்ள எஸ்.ஆர்.பாலசுப்பிரமணியம் இறந்ததாக நினைத்து, அம்மாவின் (ஜெயலலிதா) அன்பையும், ஆதரவையும் பெற்றவர் அவர் என பேச தொடங்கிவிட்டார்.

உடனடியாக, அருகிலிருந்த அமைச்சர் திண்டுக்கல் சீனிவாசன் சுதாரித்துக் கொண்டு இறந்தது எஸ்.பி.பாலசுப்பிரமணியம் என தெரிவித்தார். அதன்பின், நிலைமையை புரிந்து கொண்ட அமைச்சர் செல்லூர் ராஜூ நீங்கள் எந்த பாலசுப்பிரமணியத்தை கேட்கிறீர்கள்?. பாடகர் பாலசுப்பிரமணியமா? நாங்கள் ஆய்வு கூட்டத்தை முடித்துக்கொண்டு வந்தவுடன், நீங்கள் பாலசுப்பிரமணியம் என்று கேட்டதால் விவசாய மசோதாவுக்கு எதிராக மாநிலங்களவையில் பேசிய எஸ்.ஆர்.பாலசுப்பிரமணியத்தை பற்றி கேட்கிறீர்களோ என்று நினைத்துவிட்டேன் என்று மழுப்பலாகக் கூறி சமாளித்தார்.

தொடர்ந்து பேசியவர், பாடகர் எஸ்.பி.பாலசுப்பிரமணியம் சிறந்த பாடகர். லட்சக்கணக்கானோரின் இதயத்தை தனது இனிய குரலால் கட்டிப்போட்டவர். அவருடைய மறைவு அதிர்ச்சி அளிக்கிறது என்று கூறிவிட்டு அங்கிருந்து புறப்பட்டு சென்றார். ஒட்டுமொத்த தமிழ் மக்கள் பேசிக்கொண்டு இருக்கும் நிகழ்வை பற்றி அறிந்திருக்காதது மட்டுமின்றி, சொந்தக் கட்சி பிரமுகரின் நிலை என்ன என்பதையும் அறியாமல் உளறிக் கொட்டிய செல்லூர் ராஜுவை நெட்டிசன்கள் கிண்டலடித்து வருகின்றனர்.