இன்று ராகுல்–விஜய் சந்திப்பு: மதிய விருந்துக்கு ஏற்பாடு!

சென்னை: மக்களவை எதிர்க்கட்சித் தலைவர் ராகுல் காந்தி இன்று அக்டோபர் 10ஆம் தேதி சென்னை வருகிறார். மாணவர்களுடனான கலந்துரையாடல் நிகழ்ச்சியில் பங்கேற்பதற்கு முன்னதாக, முதலமைச்சர் விஜயைச் சந்தித்து மதிய விருந்தில் கலந்துகொள்ளத் திட்டமிடப்பட்டுள்ளது.

ராகுல் காந்தி மதியம் 12.30 மணியளவில் சென்னை வந்தடைவார் என்றும், மதிய உணவின்போது விஜயைச் சந்திப்பார் என்றும் தமிழக காங்கிரஸ் தலைவர் மாணிக்கம் தாகூர் தெரிவித்துள்ளார்.

இடைத்தேர்தல் வெற்றிக்குப் பிறகு சந்திப்பு

மதுராந்தகம், தாராபுரம் இடைத்தேர்தல்களில் தவெக வெற்றி பெற்றுள்ள நிலையில், மறுநாளே நடைபெறவுள்ள இந்தச் சந்திப்பு அரசியல் கவனத்தைப் பெற்றுள்ளது. தமிழகத்தில் தவெக தலைமையிலான கூட்டணி அரசில் காங்கிரஸ் இடம்பெற்றுள்ளதால், தற்போதைய அரசியல் நிலவரம் குறித்து இரு தலைவர்களும் பேசுவார்கள் என எதிர்பார்க்கப்படுகிறது.

காங்கிரஸ் மற்றும் தவெக மூத்த நிர்வாகிகள், அமைச்சர்கள் உள்ளிட்டோரும் மதிய உணவு சந்திப்பில் பங்கேற்கக்கூடும் எனத் தெரிவிக்கப்பட்டுள்ளது. பேச்சுவார்த்தையின் முடிவுகள் குறித்த தகவல்கள் சந்திப்புக்குப் பிறகே தெரியவரும்.

மாலை மாணவர்களுடன் கலந்துரையாடல்

மாலை 5 மணிக்கு சென்னை தீவுத்திடலில் நடைபெறவுள்ள ‘மாணவர்களின் குரல்’ நிகழ்ச்சியில் ராகுல் காந்தி பங்கேற்கிறார். கல்வி, நீட் தேர்வு தொடர்பான சிக்கல்கள், இளைஞர்களின் எதிர்பார்ப்புகள் மற்றும் வேலைவாய்ப்பு உள்ளிட்ட அம்சங்கள் கலந்துரையாடலில் இடம்பெறவுள்ளன.

நிகழ்ச்சியில் மாணவர்கள் தங்கள் கருத்துகளையும் கவலைகளையும் நேரடியாகப் பகிர வாய்ப்பு அளிக்கப்படும் என ஏற்பாட்டாளர்கள் தெரிவித்துள்ளனர். பதிவு செய்யப்பட்ட கியூஆர் குறியீடுகள் மூலமே மாணவர்களுக்கு அனுமதி வழங்கப்படும் என்றும், பெற்றோர் மற்றும் பொதுமக்களுக்கு நிகழ்ச்சி அரங்கில் அனுமதி இல்லை. மாணவர்களின் பாதுகாப்பு மற்றும் வசதிக்காகத் தனித்தனி நுழைவுப் பகுதிகளும் ஏற்பாடு செய்யப்பட்டுள்ளன.