செவ்வாயில் புதிய சாதனை: 45.22 கி.மீ. பயணித்த பெர்சிவியரன்ஸ்!

அமெரிக்கா: பூமிக்கு வெளியே மற்றொரு விண்ணுலகின் மேற்பரப்பில் அதிகத் தொலைவு பயணித்த வாகனம் என்ற சாதனையை நாசாவின் பெர்சிவியரன்ஸ் ரோவர் படைத்துள்ளது. செவ்வாய் கிரகத்தில் அக்டோபர் 11 அன்று அதன் மொத்தப் பயணத் தொலைவு 45.22 கிலோமீட்டரை எட்டியது.

இதன்மூலம், நாசாவின் ஆப்பர்சுனிட்டி ரோவர் வைத்திருந்த 45.16 கிலோமீட்டர் சாதனை முறியடிக்கப்பட்டுள்ளது. ஆப்பர்சுனிட்டி ஏறத்தாழ 15 ஆண்டுகளில் கடந்த தொலைவை, பெர்சிவியரன்ஸ் சுமார் ஐந்தரை ஆண்டுகளில் கடந்துள்ளது.

பாதையைத் தேர்ந்தெடுக்கும் தொழில்நுட்பம்

பெர்சிவியரன்ஸின் சாதனைக்கு ‘ஆட்டோநாவ்’ என்ற தானியங்கி வழிசெலுத்தும் தொழில்நுட்பம் முக்கியப் பங்காற்றியுள்ளது. நகர்ந்துகொண்டே சுற்றுப்புறத்தைப் படம்பிடிக்கும் ரோவர், தடைகளை அடையாளம் காண முப்பரிமாண வரைபடத்தை உருவாக்குகிறது. பூமியிலுள்ள இயக்கக் குழு நிர்ணயிக்கும் இடங்களுக்கு இடையே பாதுகாப்பான பாதையைத் தேர்ந்தெடுக்கிறது.

அதன் மொத்தப் பயணத் தொலைவில் 90 சதவீதத்துக்கும் அதிகமான பகுதி இந்தத் தொழில்நுட்பத்தின் உதவியுடன் கடக்கப்பட்டுள்ளது.

பழங்காலச் செவ்வாயை ஆராயும் பயணம்

ஜெசெரோ பள்ளத்தின் மேற்குப் பகுதியில் உள்ள ‘லாக் டி சார்ம்ஸ்’ வழியாக ‘இடுபி’ என்ற இடத்தை நோக்கிச் சென்றபோது இந்தச் சாதனை நிகழ்ந்தது. அங்கு பழங்கால வெப்பநீர் அமைப்புகளின் தடயங்களைத் தேட ஆய்வுக் குழு திட்டமிட்டுள்ளது.

செவ்வாயில் பழங்கால நுண்ணுயிர் வாழ்க்கைக்கான சுவடுகளைத் தேடுவதும் பாறை மாதிரிகளைச் சேகரிப்பதும் பெர்சிவியரன்ஸின் முக்கியப் பணிகள். அதன் ஆய்வுப் பயணம் 2028 இறுதிவரை நீட்டிக்கப்பட்டுள்ளது.