‘தமிழின் மீது தாக்குதல் நடத்த விடமாட்டோம்!’ – தீவுத்திடலில் ராகுல் காந்தி உறுதி!
சென்னை: தமிழ் மொழி, வரலாறு மற்றும் பண்பாட்டின் மீது தாக்குதல் நடத்த அனுமதிக்க மாட்டோம் என்று மக்களவை எதிர்க்கட்சித் தலைவர் ராகுல் காந்தி தெரிவித்தார். சென்னை தீவுத்திடலில் இன்று (அக்டோபர் 10) நடைபெற்ற ‘மாணவர்களின் குரல்’ நிகழ்ச்சியில் பங்கேற்ற அவர், மாணவர்களுடன் கலந்துரையாடி அவர்களின் கேள்விகளுக்குப் பதிலளித்தார். இது ‘சாத்ரோன் கி கூஞ்ச்’ மாணவர் சந்திப்புத் தொடரின் ஆறாவது நிகழ்ச்சியாகவும், தென்னிந்தியாவில் நடைபெற்ற முதல் நிகழ்ச்சியாகவும் அமைந்தது.
பகுத்தறிந்து கேள்வி கேளுங்கள்
திருவள்ளுவர், பெரியார் ஆகியோரின் சிந்தனைகளைச் சுட்டிக்காட்டிய ராகுல் காந்தி, மாணவர்கள் தங்களது கலை, வரலாறு, மண் மற்றும் பாரம்பரியத்தை அறிந்துகொள்ள வேண்டும் என்று வலியுறுத்தினார். ஒருவர் சொல்கிறார் என்பதற்காக எதையும் அப்படியே ஏற்றுக்கொள்ளாமல், ஆராய்ந்து கேள்விகளை எழுப்ப வேண்டும் என்றும், மனதார விரும்பும் செயல்களைச் செய்ய வேண்டும் என்றும் கேட்டுக்கொண்டார்.
தமிழ்நாட்டுக்கு வருவது பெருமையாக இருப்பதாகத் தெரிவித்த அவர், ஒவ்வொரு முறை இங்கு வரும்போதும் புதிதாக ஒன்றைக் கற்றுக்கொள்வதாகக் கூறினார்.
தொகுதி மறுவரையறை குறித்து விமர்சனம்
தமிழ் மொழி, பண்பாடு, வரலாறு மற்றும் மரபுகள் மீது மத்திய அரசு முழு அளவிலான தாக்குதலை நடத்துவதாக ராகுல் காந்தி குற்றம்சாட்டினார். தொகுதி மறுவரையறை நடவடிக்கை தமிழ்நாட்டைத் தண்டிக்கும் வகையிலும், நாடாளுமன்றத்தில் அதன் குரலைக் குறைக்கும் வகையிலும் வடிவமைக்கப்பட்டுள்ளதாகவும் அவர் விமர்சித்தார். தமிழ்நாட்டின் மொழி, வரலாறு மற்றும் பண்பாட்டின் மீது பிரதமர் மோடி தாக்குதல் நடத்த அனுமதிக்க மாட்டோம் என்று தெரிவித்தார்.
வடசென்னை வருவதாக உறுதி
கலந்துரையாடலின்போது, வியாசர்பாடியைச் சேர்ந்த மாணவி ஒருவர், வடசென்னை மக்கள் குறித்த தவறான பொதுப்பார்வையைச் சுட்டிக்காட்டினார். தங்களது பகுதிக்கு வந்து மக்களுடன் கலந்துரையாட வேண்டும் என்ற அவரது அழைப்பை ஏற்ற ராகுல் காந்தி, வியாசர்பாடிக்கு நிச்சயம் வருவதாக உறுதியளித்தார்.
Most Recent
