“பெண் குழந்தைகளுக்கு எச்சரிக்கை மட்டும் போதாது; ஆண் குழந்தைகளை எப்படி வளர்க்கிறோம் என்பதே முக்கியம்” — நடிகை ரேவதி

“வீடு, பள்ளியிலிருந்தே மரியாதை மற்றும் அறநெறிகளை கற்றுத்தர வேண்டும்; இன்றைய இளம் தலைமுறை மீது மிகுந்த நம்பிக்கை உள்ளதுபெண்களின் பாதுகாப்பிற்காக பெண் குழந்தைகளை மட்டும் எச்சரிக்கையாக இருக்கும்படி அறிவுறுத்துவதைத் தாண்டி, ஆண் குழந்தைகளை எவ்வாறு வளர்க்கிறோம் என்பதிலும் சமூகம் கவனம் செலுத்த வேண்டும் என்று நடிகை ரேவதி வலியுறுத்தியுள்ளார்.

சென்னையில் நடைபெற்ற பெண்கள் கருத்தரங்கில் கலந்துகொண்ட அவர், பெண்களின் பாதுகாப்பு, குழந்தை வளர்ப்பு, சமூக மாற்றம், இளம் தலைமுறையின் பங்களிப்பு உள்ளிட்டவை குறித்து செய்தியாளர்களிடம் தனது கருத்துகளைப் பகிர்ந்துகொண்டார்.

“ஆண் குழந்தைகளை எப்படி வளர்க்கிறோம்?”

பெண்களின் பாதுகாப்பு தொடர்பான விவாதங்களில் பெரும்பாலும் பெண்கள் எவ்வாறு நடந்துகொள்ள வேண்டும், எவ்வளவு எச்சரிக்கையாக இருக்க வேண்டும் என்பதற்கே முக்கியத்துவம் அளிக்கப்படுவதாக ரேவதி சுட்டிக்காட்டினார். அதைத் தாண்டி, ஆண் குழந்தைகளை எவ்வாறு வளர்க்கிறோம் என்பதையும் கவனிக்க வேண்டும் என்று அவர் தெரிவித்தார். ஆண் குழந்தைகளுக்கு சிறுவயதிலிருந்தே பெண்களை மதித்தல், சக மனிதர்களை மரியாதையுடன் நடத்துதல், நல்ல மதிப்பீடுகள் மற்றும் அறநெறிகளைப் பின்பற்றுதல் போன்றவற்றைக் கற்றுத்தருவது அவசியம் என்று அவர் வலியுறுத்தினார்.

வீட்டில் தொடங்க வேண்டும் மாற்றம்

இந்த மாற்றம் பள்ளிகளில் மட்டும் கொண்டுவரப்பட வேண்டிய ஒன்றல்ல என்றும் ரேவதி தெரிவித்தார். வீடு, பள்ளி, கல்லூரி, பணியிடம், சமூகம் என அனைத்து நிலைகளிலும் ஒருங்கிணைந்த மாற்றம் ஏற்பட வேண்டும் என்று அவர் கூறினார். குழந்தைகள் படிக்கும் பாடங்களிலும் அவர்களது குடும்பச் சூழலிலும் நல்ல மதிப்பீடுகளைக் கற்றுக்கொடுப்பதற்கான வாய்ப்புகள் உருவாக்கப்பட வேண்டும் என்றும் அவர் வலியுறுத்தினார்.

“பெண்களுக்கு வாய்ப்புகள் இருக்கின்றன”

பெண்களுக்கான வாய்ப்புகள் குறித்த கேள்விக்கும் ரேவதி பதிலளித்தார். தற்போது பெண்களுக்கு பல்வேறு துறைகளிலும் வாய்ப்புகள் கிடைப்பதாகக் கூறிய அவர், கிடைக்கும் வாய்ப்புகளை எவ்வாறு சரியான முறையில் பயன்படுத்துகிறோம் என்பதே முக்கியம் என்றார். பெண்களின் முன்னேற்றத்தை ஒரு குறிப்பிட்ட துறையுடன் மட்டும் இணைத்துப் பார்க்காமல், அனைத்து துறைகளிலும் அவர்களுக்கான வாய்ப்புகள் விரிவடைய வேண்டும் என்பதையும் அவர் சுட்டிக்காட்டினார்.

பெண்கள் பாதுகாப்புக்கான முயற்சிகளுக்கு வரவேற்பு

பெண்களின் பாதுகாப்பை மேம்படுத்துவதற்காக தமிழகத்தில் மேற்கொள்ளப்படும் முயற்சிகள் தொடர்பாகவும் ரேவதி பேசினார். குறிப்பாக பெண்களின் பாதுகாப்பை நோக்கமாகக் கொண்ட ‘சிங்கப்பெண் படை’ போன்ற முன்னெடுப்புகளை அவர் வரவேற்றார். அரசின் நடவடிக்கைகள் மட்டுமே முழுமையான மாற்றத்தை ஏற்படுத்திவிட முடியாது என்றும், குடும்பம் முதல் சமூகம் வரை அனைவருக்கும் இதில் பொறுப்பு இருப்பதாகவும் அவர் தெரிவித்தார்.

“இன்றைய இளம் தலைமுறை மீது நம்பிக்கை இருக்கிறது”

இளம் தலைமுறை குறித்த ரேவதியின் கருத்தும் கவனம் பெற்றது. “இன்றைய இளம் தலைமுறை மீது எனக்கு மிகுந்த நம்பிக்கை இருக்கிறது” என்று தெரிவித்த அவர், முந்தைய தலைமுறையினரால் செய்ய முடியாமல் போன பல நல்ல மாற்றங்களை தற்போதைய தலைமுறையினர் செய்து காட்டுவார்கள் என்று நம்பிக்கை தெரிவித்தார். இளம் தலைமுறையின் சிந்தனை மற்றும் சமூகத்தை அணுகும் விதத்தில் ஏற்பட்டுள்ள மாற்றங்களே இந்த நம்பிக்கைக்குக் காரணம் என்றும் அவர் குறிப்பிட்டார்.

குழந்தைகளுடன் பெற்றோர் பேச வேண்டும்

பெண்கள் மற்றும் இளம் தலைமுறையினரிடையே போதைப்பொருள் பழக்கம் ஏற்படுவது தொடர்பாக செய்தியாளர்கள் எழுப்பிய கேள்விக்கும் ரேவதி பதிலளித்தார். இதுபோன்ற பிரச்சினைகளை எதிர்கொள்ளும்போது குழந்தைகளிடம் இருந்து பெற்றோர் விலகி நிற்காமல், அவர்களுடன் வெளிப்படையாகப் பேசுவதும் அவர்களின் நடவடிக்கைகளைக் கவனிப்பதும் முக்கியம் என்று அவர் கருத்து தெரிவித்தார். பெண்களின் பாதுகாப்பு என்பது பெண்களுக்கான பிரச்சினை மட்டுமல்ல; குடும்பம், கல்வி நிறுவனங்கள், அரசு மற்றும் ஒட்டுமொத்த சமூகமும் இணைந்து செயல்பட வேண்டிய விஷயம் என்பதே ரேவதியின் கருத்துகளின் மையமாக அமைந்தது.