வெள்ளம் பாதித்த நேபாளம்; நிவாரணம் முதல் மீட்புப் பணி வரை… இதுவரை இந்தியா செய்தது என்ன?

உணவு, மருந்து, ஜெனரேட்டர்கள் முதல் மீட்புப் பணிகள் வரை கைகொடுக்கும் இந்தியா; நேபாளத்தில் சிக்கிய இந்தியர்களையும் பாதுகாப்பாக மீட்க தொடர் நடவடிக்கை

நேபாளத்தை புரட்டிப்போட்டுள்ள பெருவெள்ள பாதிப்பைத் தொடர்ந்து, அந்நாட்டுக்கு அவசரகால மனிதாபிமான உதவிகளை இந்தியா தொடர்ந்து வழங்கி வருகிறது. நிவாரணப் பொருட்களை அனுப்புவது மட்டுமின்றி, வெள்ளத்தில் சிக்கிய இந்தியர்களை மீட்பது, அவர்களை பாதுகாப்பான இடங்களுக்கு அழைத்துச் செல்வது மற்றும் இந்தியா திரும்புவதற்கான ஏற்பாடுகளை மேற்கொள்வது என பல முனைகளில் இந்தியா செயல்பட்டு வருகிறது.

இந்திய வெளியுறவுத்துறை இன்று மாலை வெளியிட்ட தகவலின்படி, நேபாளத்திற்கு இதுவரை 47 டன்னுக்கும் அதிகமான அவசரகால நிவாரணப் பொருட்கள் அனுப்பப்பட்டுள்ளன.

என்னென்ன பொருட்களை அனுப்பியுள்ளது இந்தியா?

வெள்ளத்தால் வீடுகளை இழந்தவர்கள் மற்றும் பாதிக்கப்பட்ட மக்களின் உடனடித் தேவைகளைக் கருத்தில் கொண்டு பல்வேறு அத்தியாவசியப் பொருட்கள் இந்தியாவிலிருந்து அனுப்பப்பட்டுள்ளன. உணவுப் பொருட்கள், மருந்துகள் மற்றும் மருத்துவப் பொருட்கள், குடிநீர் சுத்திகரிப்பு மாத்திரைகள், போர்வைகள், தார்ப்பாய்கள், தூங்குவதற்கான பைகள் உள்ளிட்ட நிவாரணப் பொருட்கள் இதில் அடங்குகின்றன. மின்சார வசதி பாதிக்கப்பட்ட பகுதிகளில் பயன்படுத்தக்கூடிய portable generators உள்ளிட்ட உபகரணங்களும் அனுப்பப்பட்டுள்ளன. இதுவரை அனுப்பப்பட்ட உதவிகளுடன் மேலும் சுமார் 13 டன் நிவாரணப் பொருட்களுடன் மூன்றாவது விமானத்தையும் அனுப்ப இந்தியா நடவடிக்கை மேற்கொண்டுள்ளது.

பொருட்களை அனுப்புவதோடு நிற்கவில்லை…

நேபாளத்தில் வெள்ளத்தால் பாதிக்கப்பட்ட பகுதிகளில் சிக்கியுள்ள இந்தியர்களை கண்டறிந்து மீட்பதற்கான நடவடிக்கைகளிலும் இந்திய அரசு ஈடுபட்டுள்ளது. Upper Trishuli-1 நீர்மின் திட்டப் பகுதியில் ஏற்பட்ட வெள்ளத்தில் சிக்கியிருந்தவர்களை மீட்கும் பணிகளில் நேபாள அதிகாரிகளுடன் இந்தியத் தூதரகமும் தொடர்ந்து தொடர்பில் இருந்து வருகிறது. அங்கிருந்து மீட்கப்பட்டவர்களில் 63 பேர் இந்தியர்கள் என்பது உறுதி செய்யப்பட்டுள்ளது.

சீனப் பகுதியில் சிக்கிய இந்தியர்கள்

நேபாள பேரிடரின் தாக்கம் நேபாள–திபெத் எல்லைப் பகுதிகளிலும் கடுமையாக இருந்ததால் கைலாஷ் மானசரோவர் யாத்திரைக்குச் சென்ற இந்தியர்களும் பல்வேறு இடங்களில் சிக்கினர். சீனப் பகுதியில் சிக்கியிருந்த 96 இந்தியர்கள் நிலமார்க்கமாக நேபாளத்துக்குள் பாதுகாப்பாக அழைத்து வரப்பட்டுள்ளனர். மேலும், சீனப் பகுதியில் சுமார் 400 இந்தியர்கள் பாதுகாப்பாக இருப்பதாக இந்திய வெளியுறவுத்துறை தெரிவித்துள்ளது. அவர்களுக்குத் தேவையான உதவிகளை வழங்க பெய்ஜிங்கில் உள்ள இந்தியத் தூதரகம் மற்றும் சம்பந்தப்பட்ட அதிகாரிகள் தொடர்ந்து நடவடிக்கை மேற்கொண்டு வருகின்றனர்.

தமிழக யாத்திரிகர்களின் நிலை என்ன?

நேபாள வெள்ளத்தில் தமிழகத்தைச் சேர்ந்த கைலாஷ் மானசரோவர் யாத்திரிகர்களும் சிக்கினர். மீட்கப்பட்ட தமிழக யாத்திரிகர்களில் 21 பேர் வெள்ளம் பாதித்த பகுதியிலிருந்து காத்மாண்டுவுக்கு அழைத்து வரப்பட்டு, பின்னர் இந்தியா திரும்புவதற்கான ஏற்பாடுகள் மேற்கொள்ளப்பட்டன. அவர்கள் இன்று டெல்லி வந்தடைந்துள்ளனர். தமிழகத்தைச் சேர்ந்த மற்ற யாத்திரிகர்களை கண்டறிந்து பாதுகாப்பாக மீட்பதற்கான நடவடிக்கைகளில் தமிழக அரசும் மத்திய அரசுடன் ஒருங்கிணைந்து செயல்பட்டு வருகிறது.

24 மணி நேர கட்டுப்பாட்டு அறைகள்

நேபாளம் மற்றும் சீனப் பகுதிகளில் சிக்கியுள்ள இந்தியர்களுக்கும் அவர்களது குடும்பத்தினருக்கும் உதவுவதற்காக இந்திய வெளியுறவுத்துறை கட்டுப்பாட்டு அறைகளை செயல்படுத்தியுள்ளது. காத்மாண்டுவில் உள்ள இந்தியத் தூதரகம் மற்றும் பெய்ஜிங்கில் உள்ள இந்தியத் தூதரகமும் இந்தியர்களின் நிலையை தொடர்ந்து கண்காணித்து வருகின்றன.

குடும்பத்தினரிடமிருந்து கிடைக்கும் தகவல்களின் அடிப்படையில் சிக்கியுள்ள இந்தியர்களை அடையாளம் காண்பது, உள்ளூர் அதிகாரிகளுடன் தொடர்பு கொள்வது மற்றும் மீட்கப்பட்டவர்களின் இந்தியப் பயணத்தை ஒருங்கிணைப்பது உள்ளிட்ட பணிகள் மேற்கொள்ளப்படுகின்றன.

மீட்பு மற்றும் நிவாரணம் – இரட்டை நடவடிக்கை

நேபாளத்துடனான இந்தியாவின் நீண்டகால உறவின் அடிப்படையில் பேரிடர் காலங்களில் உடனடி உதவி வழங்குவதற்கு இந்தியா தொடர்ந்து முன்னுரிமை அளித்து வருகிறது.

தற்போதைய பெருவெள்ளத்திலும் ஒருபுறம் நேபாள மக்களுக்குத் தேவையான உணவு, மருந்து மற்றும் அவசரகாலப் பொருட்களை வழங்குவதுடன், மறுபுறம் அங்கு சிக்கியுள்ள இந்தியர்களை பாதுகாப்பாக மீட்கும் நடவடிக்கைகளையும் இந்தியா மேற்கொண்டு வருகிறது.

நேபாளத்தின் தேவைக்கேற்ப கூடுதல் மனிதாபிமான உதவிகளை வழங்கவும், மீட்பு மற்றும் நிவாரண நடவடிக்கைகளில் அந்நாட்டுடன் இணைந்து செயல்படவும் இந்தியா தயாராக இருப்பதாக வெளியுறவுத்துறை தெரிவித்துள்ளது. பெருவெள்ளத்தின் பாதிப்பு இன்னும் முழுமையாக விலகாத நிலையில், நேபாளத்துக்கான இந்தியாவின் நிவாரண உதவிகளும் இந்தியர்களை மீட்கும் நடவடிக்கைகளும் தொடர்ந்து நடைபெற்று வருகின்றன.