அடுத்தடுத்து சென்னை வரும் ராகுல், மோடி: பாதுகாப்பு தீவிரம்!

சென்னை: மக்களவை எதிர்க்கட்சித் தலைவர் ராகுல் காந்தி அக்டோபர் 10 சனிக்கிழமையும், பிரதமர் நரேந்திர மோடி அக்டோபர் 11 ஞாயிற்றுக்கிழமையும் சென்னை வரவுள்ளனர். ராகுல் காந்தி மாணவர்களுடனான கலந்துரையாடலில் பங்கேற்க உள்ள நிலையில், பிரதமர் மோடி மெட்ரோ ரயில் சேவை உள்ளிட்ட திட்டங்களைத் தொடங்கி வைக்கவுள்ளார். இரு தலைவர்களின் அடுத்தடுத்த வருகையையொட்டி நிகழ்ச்சி ஏற்பாடுகளும் பாதுகாப்புப் பணிகளும் மேற்கொள்ளப்பட்டு வருகின்றன.

மாணவர்களுடன் கலந்துரையாடும் ராகுல்

சென்னை தீவுத்திடலில் நடைபெறவுள்ள ‘மாணவர்கள் குரல்’ நிகழ்ச்சியில் ராகுல் காந்தி பங்கேற்று, கல்லூரி மாணவர்கள் மற்றும் இளம் தலைமுறையினருடன் கலந்துரையாடுகிறார். மாணவர்கள் பங்கேற்பதற்கான ஏற்பாடுகளைத் தமிழக காங்கிரஸ் கமிட்டி மேற்கொண்டுள்ளது. நிகழ்ச்சிக்கான முன்பதிவுக்கு கியூஆர் குறியீடும் வெளியிடப்பட்டுள்ளது.

சென்னை வருகையின்போது கட்சியின் மூத்த நிர்வாகிகளுடன் தமிழக அரசியல் நிலவரம் குறித்தும் ராகுல் காந்தி ஆலோசனை நடத்தவுள்ளதாகத் தெரிவிக்கப்பட்டுள்ளது.

மெட்ரோ சேவையைத் தொடங்கி வைக்கும் மோடி

மறுநாள் சென்னை வரும் பிரதமர் மோடி, சென்னை மெட்ரோ ரயில் இரண்டாம் கட்டத் திட்டத்தின் பூந்தமல்லி–வடபழனி இடையிலான சுமார் 14.6 கிலோமீட்டர் வழித்தடத்தைத் தொடங்கி வைக்கவுள்ளார்.

பழனி, பரமக்குடி, நாமக்கல், அம்பாசமுத்திரம் மற்றும் வேலூர் கண்டோன்மென்ட் ஆகிய இடங்களில் மேம்படுத்தப்பட்ட அம்ரித் பாரத் ரயில் நிலையங்களையும் காணொலி வாயிலாகத் திறந்து வைக்கவுள்ளார். இசையமைப்பாளர் இளையராஜா நிறுவியுள்ள இசை ஆராய்ச்சி மையத்தின் தொடக்க நிகழ்ச்சியிலும் பிரதமர் பங்கேற்க உள்ளார்.

முக்கியப் பகுதிகளில் ட்ரோன்கள் பறக்கத் தடை

பிரதமரின் வருகையை முன்னிட்டு சென்னையின் முக்கியப் பகுதிகள் சிவப்பு மண்டலமாக அறிவிக்கப்பட்டு, ட்ரோன்கள் பறக்கத் தடை விதித்து சென்னை பெருநகரக் காவல்துறை உத்தரவிட்டுள்ளது.

சென்னை விமான நிலையம், பிரதமர் செல்லும் வழித்தடங்கள் மற்றும் நிகழ்ச்சி நடைபெறும் இடங்களில் கூடுதல் பாதுகாப்பு ஏற்பாடுகள் மேற்கொள்ளப்பட்டுள்ளன. சிறப்புப் பாதுகாப்புக் குழுவினர், காவல்துறை மற்றும் விமான நிலையப் பாதுகாப்பு அதிகாரிகள் இணைந்து ஏற்பாடுகளை ஆய்வு செய்து வருகின்றனர்.

ராகுல்–விஜய் சந்திப்பு உறுதியாகவில்லை

ராகுல் காந்தியின் சென்னை வருகையின்போது முதலமைச்சர் விஜயைச் சந்திப்பாரா என்ற எதிர்பார்ப்பும் எழுந்துள்ளது. எனினும், அந்தச் சந்திப்பு குறித்த உறுதியான அறிவிப்பு வெளியாகவில்லை. பிரதமர் பங்கேற்கும் நிகழ்ச்சிகளில் முதலமைச்சர் விஜயும் கலந்துகொள்வார் என எதிர்பார்க்கப்படுகிறது.