நீட் தேர்வில் இரு கட்ட முறை? நாடாளுமன்றக் குழு பரிந்துரை!

மருத்துவப் படிப்புகளுக்கான நீட் தேர்வை கணினிவழியில் நடத்துவது, இரு கட்டத் தேர்வு முறையின் சாத்தியத்தை ஆய்வு செய்வது உள்ளிட்ட முக்கிய மாற்றங்களை நாடாளுமன்ற நிலைக்குழு பரிந்துரைத்துள்ளது.

புதுடெல்லி: தேசியத் தேர்வு முகமையை வலுப்படுத்துவது தொடர்பான 382-வது அறிக்கையை, முகுல் வாஸ்னிக் தலைமையிலான கல்வி, மகளிர், குழந்தைகள், இளைஞர் மற்றும் விளையாட்டுத் துறைகளுக்கான நாடாளுமன்ற நிலைக்குழு அக்டோபர் 9 அன்று மாநிலங்களவைத் தலைவரிடம் சமர்ப்பித்தது. அதன் அதிகாரப்பூர்வ அறிக்கையில், தேர்வுப் பாதுகாப்பு மற்றும் மாணவர்களின் அணுகலை மேம்படுத்தப் பல பரிந்துரைகள் இடம்பெற்றுள்ளன.

பொதுத் தேர்வு; படிப்புவாரியான முதன்மைத் தேர்வு

மருத்துவப் பிரிவுகளுக்குப் பொதுவான முதல்நிலைத் தேர்வையும், குறிப்பிட்ட படிப்புகளுக்குத் தனித்தனி முதன்மைத் தேர்வுகளையும் நடத்துவதற்கான சாத்தியத்தை ஆய்வு செய்யக் குழு கூறியுள்ளது. வெவ்வேறு படிப்புகளை நாடும் மாணவர்களிடையேயான தேவையற்ற போட்டியைக் குறைப்பது இதன் நோக்கம்.

கணினிவழித் தேர்வுக்கு முன் கட்டமைப்பு

நீட் தேர்வைக் கணினிவழிக்கு மாற்றுவதற்கு முன்பாக, கிராமப்புறங்கள் உள்ளிட்ட பகுதிகளில் அரசு தேர்வு மையங்களை உருவாக்க வேண்டும். ஒவ்வொரு மாவட்டத்திலும் குறைந்தது ஒரு மையம், மாணவர்களுக்குப் பயிற்சித் தேர்வுகள், மதிப்பெண் சமன்படுத்தலில் வெளிப்படைத்தன்மை ஆகியவற்றையும் குழு வலியுறுத்தியுள்ளது.

வயது மற்றும் முயற்சி வரம்புகள்

நியாயமான வயது வரம்பையும், தேர்வு எழுதும் முயற்சிகளுக்கான வரம்பையும் சம்பந்தப்பட்ட அமைச்சகங்கள் ஆராய வேண்டும் எனப் பரிந்துரைக்கப்பட்டுள்ளது. குறிப்பிட்ட வயதையோ, முயற்சி எண்ணிக்கையையோ குழு நிர்ணயிக்கவில்லை.

வினாத்தாள் பாதுகாப்பும் மாணவர் நலனும்

தொடர்ந்து புதுப்பிக்கப்படும் வினா வங்கி, தேர்வுக்கு நெருக்கமாக வினாத்தாள் தயாரித்தல், நிரந்தர நிபுணர் பணியாளர்கள் ஆகியவை பரிந்துரைக்கப்பட்டுள்ளன. உண்மையான காரணங்களால் சில நிமிடங்கள் தாமதமாக வருவோரை, கூடுதல் நேரமின்றி மீதமுள்ள நேரத்தில் தேர்வெழுத அனுமதிக்கும் நடைமுறையையும் ஆராயக் கூறப்பட்டுள்ளது. pib.gov.in

மாணவர்கள் கவனிக்க வேண்டியது

இவை நாடாளுமன்றக் குழுவின் பரிந்துரைகள். இவற்றை அமல்படுத்தும் தனி அறிவிப்பாக இந்த அறிக்கையை எடுத்துக்கொள்ளக்கூடாது. அடுத்த தேர்வுக்கான நடைமுறைகளை அதிகாரப்பூர்வ அறிவிப்பின் அடிப்படையிலேயே மாணவர்கள் உறுதிப்படுத்த வேண்டும்.