காவல்நிலையம் சூரை, ஆர்.பி.உதயகுமார் கைது, எடப்பாடி பழனிசாமி கண்டனம்!
காவல் நிலையத்திற்கே பாதுகாப்பு இல்லாததை தான் நான்காண்டு ஆட்சியின் சாதனைப் பட்டியலில் முதலில் சேர்க்க வேண்டிய சாதனை என்று எடப்பாடி பழனிசாமி விமர்சித்துள்ளார்.
மதுரை மாவட்டம் திருமங்கலம் அடுத்துள்ள வி.சத்திரப்பட்டி காவல் நிலையம் நேற்று மர்ம நபர்களால் தாக்கப்பட்டு சூரையாடப்பட்டது. இந்தத் தாக்குதலில் காவலர் ஒருவரும் காயமடைந்து சிகிச்சை பெற்று வருகிறார்.
இதனையடுத்து, சட்டப்பேரவை எதிர்க்கட்சித் துணைத்தலைவர் ஆர்.பி. உதயகுமார் இன்று இக்காவல் நிலையத்தை பார்வையிடச் சென்றார். அப்போது அவருக்கு அனுமதி மறுத்ததையடுத்து அவர் தர்னாவில் ஈடுபட்டார். இதனால் காவல்துறையினர் ஆர்.பி.உதயகுமாரை கைது செய்தனர்.
இந்த சம்பவத்திற்கு எதிர்க்கட்சித் தலைவர் எடப்பாடி பழனிசாமி கண்டனம் தெரிவித்துள்ளார். இது தொடர்பாக அவர் தனது எகஸ் பக்கத்தில்,
திமுக ஆட்சியில் காவல் நிலையத்திற்கே பாதுகாப்பு இல்லை
காவல் நிலையத்தையே காக்க முடியாத இந்த பொம்மை முதல்வர், தமிழ்நாட்டு மக்களை எப்படி காக்கப் போகிறார்?
மதுரை மாவட்டம் திருமங்கலம் அருகே உள்ள V. சத்திரப்பட்டி காவல் நிலையத்தில் நேற்று புகுந்த மர்மநபர்கள், காவல் நிலையத்தைத் தாக்கி, சூறையாடியதாக வரும் செய்தி அதிர்ச்சியளிக்கிறது.
இதனையடுத்து, எனது அறிவுறுத்தலின்படி, சட்டமன்ற எதிர்க்கட்சித் துணைத் தலைவர் திரு. ஆர்.பி. உதயகுமார் அவர்கள் அக்காவல் நிலையத்தை பார்வையிடச் சென்றபோது, அவர் ஸ்டாலின் மாடல் அரசின் காவல்துறையால் தடுத்து நிறுத்தப்பட்டு, கைது செய்யப்பட்டுள்ளதற்கு எனது கடும் கண்டனம்.
ஸ்டாலின் ஆட்சியில் மக்களுக்கு பாதுகாப்பு இல்லை; மக்களைக் காக்க வேண்டிய காவல்துறைக்கு பாதுகாப்பு இல்லை; தற்போது உச்சத்தின் உச்சமாக காவல் நிலையத்திற்கே பாதுகாப்பு இல்லை.
நான்காண்டு ஆட்சியின் சாதனைப் பட்டியலில் முதலில் சேர்க்க வேண்டிய சாதனை இது தான்.
உங்கள் கட்டுப்பாட்டில் இருக்கும் காவல் நிலையம் தாக்குதலுக்கு உள்ளாவது உங்களுக்கு வெட்கமாக இல்லையா பொம்மை முதல்வரே?
காவல் நிலையத்தையே காக்க முடியாத இந்த திமுக ஆட்சி, எப்படி மக்களைக் காக்கும்? வாய்ப்பே இல்லை.
V. சத்திரப்பட்டி காவல் நிலையத் தாக்குதலில் ஈடுபட்டோர் மீது கடும் சட்ட நடவடிக்கை எடுக்க வேண்டும் என ஸ்டாலின் மாடல் திமுக அரசை வலியுறுத்துகிறேன்.
எப்போதும் நான் சொல்வதை மீண்டும் தமிழ்நாட்டு மக்களுக்கு ஒருமுறை சொல்லிக்கொள்ள விழைகிறேன்- மக்களே, இந்த ஸ்டாலின் மாடல் திமுக ஆட்சி ஒழியும் வரை நமக்கு நாம் தான் பாதுகாப்பு என்று தெரிவித்துள்ளார்.
