By மத்திய அமைச்சர்கள் பங்கேற்கும் இரண்டு நாள் ‘சிந்தன் ஷிவிர்’ ஆலோசனைக் கூட்டம் செப்டம்பர் 23 மற்றும் 24 ஆகிய தேதிகளில் நடைபெறவுள்ளது. பிரதமர் நரேந்திர மோடி தலைமையில் நடைபெறும் இந்தக் கூட்டத்தில் மத்திய அமைச்சரவையின் அனைத்து அமைச்சர்களும் பங்கேற்க உள்ளதாகத் தகவல் வெளியாகியுள்ளது.
அமைச்சர்கள் குழுக்கள் அமைப்பு
ஆலோசனைக் கூட்டத்தை முன்னிட்டு, தலா எட்டு அமைச்சர்களைக் கொண்ட ஆறுக்கும் மேற்பட்ட குழுக்களை அமைக்க பிரதமர் அறிவுறுத்தியுள்ளார். இந்தக் குழுக்கள் தங்களுக்கு ஒதுக்கப்பட்ட தலைப்புகள் குறித்து விரிவாக ஆலோசித்து, கூட்டத்தில் கருத்துகளையும் செயல்திட்டங்களையும் முன்வைக்கவுள்ளன.
நிர்வாகம் முதல் தகவல் தொடர்பு வரை
அரசின் செயல்பாட்டை மேம்படுத்துவது, நிர்வாகச் சீர்திருத்தங்கள், அமைச்சகங்களுக்கு இடையிலான ஒருங்கிணைப்பு, தகவல் தொடர்பு மற்றும் தனிப்பட்ட செயல்திறன் மேம்பாடு உள்ளிட்ட அம்சங்கள் ஆலோசிக்கப்படவுள்ளன. அரசுத் திட்டங்களின் செயலாக்கம் மற்றும் பொதுமக்களுக்கான சேவைகளை மேம்படுத்துவது குறித்தும் விவாதிக்கப்படவுள்ளதாகத் தெரிவிக்கப்பட்டுள்ளது.
அரசுத் திட்டங்களின் செயல்பாடு குறித்து ஆய்வு
மத்திய அரசின் முக்கியத் திட்டங்கள் களத்தில் எவ்வாறு செயல்படுத்தப்படுகின்றன என்பது குறித்தும் அமைச்சர்கள் விவாதிக்கவுள்ளனர். திட்டங்களை நடைமுறைப்படுத்துவதில் ஏற்படும் சிக்கல்கள், அமைச்சகங்களுக்கு இடையிலான பணிப் பகிர்வு மற்றும் பொதுச் சேவைகளை விரைவுபடுத்துவதற்கான நடவடிக்கைகள் ஆகியவற்றுக்கும் முக்கியத்துவம் அளிக்கப்படும் என எதிர்பார்க்கப்படுகிறது.
