மீண்டும் இயற்கையின் மடியில்; காட்டில் விடப்பட்ட 2 பெருங்கானமயில்கள்!

ஜெய்சல்மர், ராஜஸ்தான்: அழிவின் விளிம்பில் உள்ள பெருங்கானமயில்களைப் பாதுகாக்கும் முயற்சியில் முக்கிய மைல்கல்லாக, சிறைப்பெருக்க முறையில் வளர்க்கப்பட்ட இரண்டு ஆண் பெருங்கானமயில்கள் இன்று இயற்கை வாழிடத்தில் விடப்பட்டன.

ஜெய்சல்மரில் உள்ள பாலைவன தேசியப் பூங்காவின் சாம் பகுதியில், மத்திய சுற்றுச்சூழல் அமைச்சர் பூபேந்தர் யாதவ் இந்த இரண்டு பறவைகளையும் இயற்கை வாழிடத்தில் விடுவித்தார். ராஜஸ்தான் வனம் மற்றும் சுற்றுச்சூழல் துறை அமைச்சர் சஞ்சய் சர்மா உள்ளிட்டோர் நிகழ்ச்சியில் பங்கேற்றனர்.

பத்து ஆண்டுகால முயற்சி

இந்திய விஞ்ஞானிகள், ஆராய்ச்சியாளர்கள் மற்றும் களப் பணியாளர்களின் ஏறத்தாழ பத்து ஆண்டுகாலத் தொடர் முயற்சியால் இந்த முக்கியமான நிலை எட்டப்பட்டுள்ளதாக பூபேந்தர் யாதவ் தெரிவித்துள்ளார்.

பெருங்கானமயில் பாதுகாப்புத் திட்டம் இதுவரை இனப்பெருக்க மையங்களில் பறவைகளின் எண்ணிக்கையை அதிகரிப்பதில் கவனம் செலுத்தியது. தற்போது சிறைப்பெருக்கத்தில் வளர்க்கப்பட்ட பறவைகளை மீண்டும் இயற்கை வாழிடத்தில் வாழச் செய்யும் அடுத்தகட்டத்துக்கு இத்திட்டம் முன்னேறியுள்ளது.

பாதுகாப்பு மையங்களில் 97 பறவைகள்

சாம் மற்றும் ராம்தேவ்ரா பாதுகாப்பு மையங்களில் தற்போது மொத்தம் 97 பெருங்கானமயில்கள் பராமரிக்கப்படுகின்றன. அவற்றில் 40 பறவைகள் இயற்கையில் இடப்பட்ட முட்டைகளிலிருந்து உருவானவை; 57 பறவைகள் சிறைப்பெருக்க முறையில் பிறந்தவை.

இந்தப் பறவைகளில் 86 இனப்பெருக்கத்திற்காகப் பராமரிக்கப்படுகின்றன. 11 பறவைகள் இயற்கை வாழிடத்தில் விடுவதற்காகத் தேர்வு செய்யப்பட்ட நிலையில், அவற்றில் இரண்டு ஆண் பறவைகள் இன்று விடுவிக்கப்பட்டுள்ளன.

சிறைப்பெருக்கத் திட்டத்தின் மூலம் 2025ஆம் ஆண்டில் 24 குஞ்சுகளும், 2026ஆம் ஆண்டில் 29 குஞ்சுகளும் உயிருடன் பொரிக்கப்பட்டதாக மத்திய சுற்றுச்சூழல் அமைச்சகம் தெரிவித்துள்ளது.

200 சதுர கிலோமீட்டர் பாதுகாக்கப்பட்ட புல்வெளி

பெருங்கானமயில்களின் வாழிடத்தைப் பாதுகாக்க, பாலைவன தேசியப் பூங்காவுக்குள் சுமார் 200 சதுர கிலோமீட்டர் பரப்பளவில் வேலியிடப்பட்ட புல்வெளிப் பகுதிகளை ராஜஸ்தான் வனத்துறை உருவாக்கியுள்ளது. இப்பகுதிகள் அந்தப் பறவைகளின் முக்கிய இனப்பெருக்க வாழிடங்களாக இருப்பது ஆய்வுகளில் கண்டறியப்பட்டுள்ளது.

இன்று விடப்பட்ட பறவைகளின் இயக்கம் மற்றும் இயற்கைச் சூழலுக்கு அவை தங்களைத் தகவமைத்துக்கொள்ளும் விதம் தொடர்ந்து கண்காணிக்கப்படும். இதன் மூலம் கிடைக்கும் தகவல்களின் அடிப்படையில், அடுத்தடுத்த பறவைகளை விடுவிப்பதற்கான நடைமுறைகள் மேம்படுத்தப்பட உள்ளன.

மத்திய சுற்றுச்சூழல் அமைச்சகம், ராஜஸ்தான் வனத்துறை மற்றும் இந்திய வனவிலங்கு நிறுவனம் இணைந்து இந்தப் பாதுகாப்புத் திட்டத்தைச் செயல்படுத்துகின்றன.