ரகசியமாகப் பதிவுசெய்யுமா? Meta கண்ணாடி விற்பனை நிறுத்தம்!

ஆம்ஸ்டர்டாம்: கேமரா பொருத்தப்பட்ட ஸ்மார்ட் கண்ணாடிகள் மூலம் பொதுமக்கள் அவர்களுக்கே தெரியாமல் பதிவுசெய்யப்படலாம் என்ற தனியுரிமை அச்சம் அதிகரித்துள்ளது. இதையடுத்து நெதர்லாந்து மற்றும் பெல்ஜியத்தில் Ray-Ban Meta ஸ்மார்ட் கண்ணாடிகளின் விற்பனையை Hans Anders நிறுவனம் நிறுத்தியுள்ளது.

நெதர்லாந்தின் மிகப்பெரிய கண் கண்ணாடி விற்பனை நிறுவனங்களில் ஒன்றான Hans Anders எடுத்துள்ள இந்த முடிவு, ஸ்மார்ட் கண்ணாடிகளுக்கு எதிராக ஒரு விற்பனை நிறுவனம் மேற்கொண்ட முதல் முக்கிய நடவடிக்கைகளில் ஒன்றாகக் கருதப்படுகிறது.

என்ன பிரச்னை?

Ray-Ban Meta கண்ணாடிகளில் கேமரா, மைக்ரோஃபோன் மற்றும் செயற்கை நுண்ணறிவுத் தொழில்நுட்பம் இடம்பெற்றுள்ளன. இதன்மூலம் பயனர்கள் புகைப்படம் எடுக்கவும், காணொலி பதிவு செய்யவும், இணையத்தில் நேரலை செய்யவும் முடியும்.

ஆனால் இந்தக் கண்ணாடிகளை அணிந்திருப்பவர் பதிவு செய்கிறாரா என்பதை அருகில் இருப்பவர்கள் உடனடியாக அறிந்துகொள்ள முடியாது என்ற குற்றச்சாட்டு எழுந்துள்ளது. பொது இடங்களில் மக்களின் அனுமதியின்றி அவர்களை ரகசியமாகப் பதிவுசெய்யக்கூடிய அபாயம் இருப்பதாக தனியுரிமை அமைப்புகள் எச்சரித்துள்ளன.

Meta அளித்த விளக்கம்

கண்ணாடியில் புகைப்படம் அல்லது காணொலி பதிவுசெய்யப்படும்போது, அதன் முன்புறத்திலுள்ள விளக்கு ஒளிரும் என்று Meta தெரிவித்துள்ளது. அந்த விளக்கை மறைக்கவோ சேதப்படுத்தவோ முயன்றால், கேமரா செயல்படாத வகையில் பாதுகாப்பு வசதி செய்யப்பட்டுள்ளதாகவும் நிறுவனம் விளக்கம் அளித்துள்ளது.

எனினும், இந்த விளக்கு போதுமான எச்சரிக்கையாக இல்லை என்றும், பதிவு செய்யப்படுபவரின் அனுமதியை உறுதிசெய்யும் வசதி கண்ணாடியில் இல்லை என்றும் நுகர்வோர் அமைப்புகள் கூறுகின்றன.

நீதிமன்ற நடவடிக்கை எச்சரிக்கை

அடையாளம் காணக்கூடிய நபர்கள் இடம்பெறும் காணொலிகளை அவர்களின் அனுமதியின்றி பகிர்வதோ வெளியிடுவதோ பொதுவாகச் சட்டவிரோதமானது என்று நெதர்லாந்து தனியுரிமை ஒழுங்குமுறை அமைப்பு எச்சரித்துள்ளது.

தனியுரிமைச் சட்டங்களுக்கு ஏற்ப ஸ்மார்ட் கண்ணாடிகளில் மாற்றம் செய்யாவிட்டால் Meta நிறுவனத்திற்கு எதிராக நீதிமன்றத்தை அணுகப்போவதாக நெதர்லாந்தின் Consumentenbond நுகர்வோர் அமைப்பும் தெரிவித்துள்ளது.

எல்லா நாடுகளிலும் தடையா?

இது Meta கண்ணாடிகளுக்கு விதிக்கப்பட்ட அரசுத் தடையல்ல. Hans Anders நிறுவனம் தனது கடைகளில் மட்டும் விற்பனையை நிறுத்தியுள்ளது. அந்த நிறுவனம் நெதர்லாந்து மற்றும் பெல்ஜியத்தில் மட்டுமே Meta ஸ்மார்ட் கண்ணாடிகளை விற்பனை செய்துவந்தது.

Hans Anders நிறுவனத்தின் தாய் நிறுவனமான Nexeye, ஐந்து ஐரோப்பிய நாடுகளில் மொத்தம் 776 கடைகளை நடத்தி வருவது குறிப்பிடத்தக்கது.