காஷ்மீர் செட்டை ஜார்ஜியாவில் போடும்‘பீஸ்ட்’படக்குழுவினர்!!

காஷ்மீரில் நடைபெறுவது போன்ற காட்சியை ‘பீஸ்ட்’ படத்திற்காக படக்குழுவினர் ஜார்ஜியாவில் செட் அமைத்து எடுக்கவுள்ளதாக படப்பிடிப்பு தளத்திலிருந்து தகவல் வெளியாகியுள்ளது.

லோகேஷ் கனகராஜ் உடனான ‘மாஸ்டர்’ வெற்றிக்குப்பிறகு நெல்சன் திலீப் குமார் இயக்கத்தில் ‘பீஸ்ட்’ படத்தில் நடித்து வருகிறார் விஜய். டாக்டர் படத்திற்கு பிறகு நெல்சன் இயக்கும் திரைப்படம் இது. பூஜா ஹெக்டே, செல்வராகவன், யோகி பாபு உள்ளிட்டோர் இணைந்துள்ளார்கள். அனிருத் இசையமைகிறார். இப்படத்தின் முதற்கட்ட படப்பிடிப்பு கடந்த ஏப்ரல் மாதம் ஜார்ஜியாவில் தொடங்கியது. ஏப்ரல் 7 ஆம் தேதியன்று ஜார்ஜியா புறப்பட்டார் விஜய். சில நாட்கள் அங்கு ஷூட்டிங் நடைபெற்ற நிலையில், கொரோனா பரவல் காரணமாக படப்பிடிப்பு நடத்துவதில் சிக்கல் ஏற்பட்டதால் சென்னை திரும்பியது படக்குழு. இதனால், மீதமுள்ள படப்பிடிப்பை இம்மாத இறுதியில் ஜார்ஜியா சென்று படமாக்கவுள்ளனர். இன்னும் 15 நாட்களில் படப்பிடிப்பு முடியும் என்றும் அதன் பின்னர் படத்தின் ஃபர்ஸ்ட் சிங்கிள் வெளியாக வாய்ப்பு இருப்பதாகவும் தெரிகிறது.

படத்தில் விஜய் ராணுவ வீரராக நடிக்கிறார் என்றும் தீவிரவாதிகளிடம் சிக்கும் மக்களை மீட்பதுதான் ‘பீஸ்ட்’ படத்தின் கதை என்றும் இல்லை இது தங்கக்கடத்தல் குறித்து விவரிக்கும் படம் என்றும் சொல்லப்படுகிறது. இதுவரை 85 சதவீத படப்பிடிப்பு நிறைவடைந்திருக்கிறது. இறுதிக்கட்டப் படப்பிடிப்பை காஷ்மீரில் எடுக்கத்திட்டமிட்டிருந்தனர். ஆனால், அங்கு பாதுகாப்பு காரணங்களால் எடுப்பதில் சிக்கல் வரும் என்பதால் காஷ்மீர், மற்றும் இந்தியா பாகிஸ்தான் எல்லையை செட்டிங்ஸ் மூலம் ஜார்ஜியாவில் எடுக்கவுள்ளனர் என படப்பிடிப்பு தளத்திலிருந்து தகவல் வெளியாகியுள்ளது.