கவாசகி பைக் மாடலில் விலை குறைப்பு.. விழாக்கால அதிரடி சலுகை

கவாசகி நிறுவனத்தின் மோட்டார்சைக்கிள் மாடலின் விற்பனையை ஊக்குவிக்க அதிரடி தள்ளுபடி அறிவிக்கப்பட்டு உள்ளது.

ஊரடங்குக்குப் பிறகு ஆட்டோமொபைல் துறை இயல்புநிலைக்கு திரும்பினாலும், விற்பனை ஆனது இன்னும் முழு வீச்சில் தொடங்கவில்லை. இந்த சூழலில் விற்பனையை ஊக்குவிக்கும் விதமாக, பல நிறுவனங்கள் பல்வேறு சலுகைகளை வழங்கி வருகின்றன.

சமீபத்தில், ரெனால்ட் நிறுவனம் தனது கார் மாடல்கள் மீது சுமார் ரூ.1 லட்சம் வரையில் சலுகைகளை அறிவித்து இருந்தது. அதைத்தொடர்ந்து, தற்போது கவாசகி நிறுவனமும் தனது, வெர்சிஸ் 650 மிடில் வெயிட் அட்வென்ச்சர் டூரர் மோட்டார்சைக்கிளின் விலையில் ரூ. 30 ஆயிரம் தள்ளுபடியை அறிவித்துள்ளது.

வவுச்சர் அல்லது இலவச அக்சஸரீக்கள் வடிவில் வழங்கப்படும் இந்த தள்ளுபடி நவம்பர் 30 அல்லது ஸ்டாக் இருக்கும் வரை வழங்கப்படும் என அறிவிக்கப்பட்டு உள்ளது.

கடந்த ஆகஸ்ட் மாதத்தில் இந்திய சந்தையில் அறிமுகம் செய்யப்பட்ட கவாசகி வெர்சிஸ் 650 மாடல் விலை ரூ. 6.79 லட்சம் என நிர்ணயம் செய்யப்பட்டு உள்ளது. இது பிஎஸ்4 மாடலை விட ரூ. 10 ஆயிரம் வரை அதிகம் ஆகும். அனைத்து விலைகளும் எக்ஸ் ஷோரூம் அடிப்படையில் குறிப்பிடப்பட்டு உள்ளது.

புதிய வெர்சிஸ் 650 மாடலில் 649சிசி, பேரலெல் ட்வின் சிலிண்டர், லிக்விட் கூல்டு என்ஜின் வழங்கப்பட்டு இருக்கிறது. இது 65.7 பிஹெச்பி பவர், 61 என்எம் டார்க் செயல்திறன் வழங்குகிறது. இதன் பிஎஸ்4 மாடல் என்ஜின் 67.4 பிஹெச்பி பவர், 64 என்எம் டார்க் செயல்திறன் வழங்குகிறது. இத்துடன் 6 ஸ்பீடு கியர்பாக்ஸ் வழங்கப்பட்டு உள்ளது