மின்னணு வாக்காளர் புகைப்பட அடையாள அட்டை இன்று வெளியீடு : அறிமுகம் செய்கிறார் குடியரசு தலைவர்

தேசிய வாக்காளர் தினத்தை முன்னிட்டு மின்னணு வாக்காளர் புகைப்பட அடையாள அட்டையை இன்று இந்திய தலைமை தேர்தல் ஆணையம் அறிமுகம் செய்கிறது.

புதுடெல்லி:

இந்தியா முழுவதும் ஆண்டுதோறும் ஜனவரி 25 ம் தேதி தேசிய வாக்காளர் தினமாக கடைபிடிக்கப்படுகிறது. புதிய வாக்காளர்களின் பதிவை அதிகரிக்கும் நிகழ்வாக தலைநகர் டெல்லியில் நடைபெறும் நிகழ்ச்சியில் குடியரசுத்தலைவர் ராம்நாத் கோவிந்த் காணொளி காட்சி மூலம் இன்று கலந்துகொள்ள இருக்கிறார்.

இந்தநிகழ்ச்சியில் 2020 மற்றும் 2021ஆம் ஆண்டுக்கான தேசிய விருதுகளை வழங்க இருக்கும் குடியரசுத் தலைவர் ராம் நாத் கோவிந்த் ”ஹலோ வாக்காளர்கள்” என்ற பெயரில் இந்திய தேர்தல் ஆணையத்தின் புதிய இணைய தள வானொலியையும் தொடங்கி வைக்கிறார்.

மேலும், அதை தொடர்ந்து மின்னணு வாக்காளர் அடையாள அட்டையையும் வழங்க இந்திய தலைமை தேர்தல் ஆணையம் முடிவு செய்துள்ளது. இந்த ஆண்டு முதல் முறை ஓட்டு போட உள்ள வாக்காளர்கள் தங்கள் மொபைல் எண்ணுடன் விண்ணப்பித்துள்ள அனைவருக்கும் வரும் 25 ம் தேதி முதல் 31 ம் தேதி வரை, ‘இ – இபிக்’ எனப்படும் மின்னணு வாக்காளர் புகைப்பட அடையாள அட்டை வழங்கப்பட உள்ளது.

Read more – இன்றைய ராசிபலன் 25.01.2021!!!

அந்த மின்னணு அடையாள அட்டையில் புகைப்படம், வரிசை எண், பகுதி எண் உள்ளிட்ட விபரங்களுடன், பாதுகாப்பான ‘க்யூஆர் கோடு’ வசதி இருக்கும் எனவும், அதனை வலைதளம் மூலம் மொபைல் போன் அல்லது கம்ப்யூட்டரில் பதிவிறக்கம் செய்து கொள்ளலாம் எனவும் தேர்தல் ஆணையம் ஏற்கனவே தெரிவித்துள்ளது.

அதன் தொடர்ச்சியாக வரும் பிப்ரவரி 1 ம் தேதி முதல் இந்தியாவில் உள்ள அனைத்து வாக்காளர்களுக்கும், ‘இ – இபிக்’ பதிவிறக்கிக் கொள்ளும் வசதி அறிமுகப்படுத்தப்பட உள்ளதால் வாக்காளர் அடையாள அட்டை வழங்குவதில் ஏற்படும் தாமதம், அடையாள அட்டை காணாமல் போவது, சேதமடைவது போன்ற பிரச்சினைகளை இதன் மூலம் தவிர்க்கலாம் என்று இந்திய தேர்தல் ஆணையம் தெரிவித்துள்ளது.