ஒவ்வொரு வீட்டிலும் தேசியக்கொடி… பிரதமர் மோடி அழைப்பு

நாட்டு மக்கள் அனைவரும் ஆகஸ்டு 13ம் தேதி முதல் ஆகஸ்டு 15ம் தேதி வரை வீடுகளில் தேசிய கொடி ஏற்ற பிரதமர் மோடி அழைப்பு விடுத்துள்ளார்.

நாட்டின் 75வது சுதந்திர தினம் வரும் ஆகஸ்டு 15ம் தேதி கொண்டாடப்படவிருக்கிறது.இந்த சுதந்திர தினத்தை சிறப்பாக கொண்டாடும் வகையில் “அசாதி கா அம்ரித் மோட்சாவ்” என்ற பெயரில் மத்திய அரசு பல்வேறு நிகழ்ச்சிகளுக்கு ஏற்பாடு செய்துள்ளது. இதன் ஒரு பகுதியாக ஒவ்வொரு வீட்டிலும் தேசியக்கொடி என்ற நிகழ்ச்சிக்கான ஏற்பாட்டை செய்து வருகிறது. இந்நிலையில், சுதந்திர தினத்தை கொண்டாடும் வகையில் நாட்டு மக்கள் அனைவரும் தங்கள் வீடுகளில் தேசியக்கொடியை ஏற்றுமாறு பிரதமர் மோடி அழைப்பு விடுத்துள்ளார்.

இது தொடர்பாக அவர் வெளியிட்டுள்ள ட்விட்டர் பதிவில், “இந்த ஆண்டு நாம் அசாதி கா அம்ரித் மோட்சாவ் நிகழ்ச்சிகளை மேற்கொண்டு வருகிறோம். இதை மேலும் வலுப்படுத்தும் விதமாக ஆகஸ்டு 13 முதல் ஆகஸ்டு 15 வரை உங்கள் வீடுகளில் தேசியக் கொடியை ஏற்றுங்கள். இந்த இயக்கம் தேசியக்கொடியுடனான நமது இணைப்பை மேலும் அதிகரிக்கும்” என குறிப்பிட்டுள்ளார். கர்நாடக மாநிலத்தில் மாணவர்கள் ஒவ்வொருவரும் தங்கள் வீடுகளில் தேசியக் கொடியை ஏற்ற வேண்டும் என அம்மாநில பள்ளிக்கல்வித்துறை உத்தரவிட்டிருந்தது குறிப்பிடத்தக்கது.