மும்பை தாக்குதல் தொடர்பான உண்மையை ஒப்புக்கொண்ட பாகிஸ்தான்.. 11 பயங்கரவாதிகள் அடைக்கலம்

மும்பை தாக்குதலுக்கு உதவிய பயங்கரவாதிகள் பாகிஸ்தானில் இருப்பதை, அந்நாட்டு உயர்மட்ட விசாரணை ஆணையம் ஒப்புக்கொண்டுள்ளது.

கடந்த 2008ம் ஆண்டு மும்பையில் நடந்த பயங்கரவாத தாக்குதலுக்கு உதவிய 11 பயங்கரவாதிகள் பாகிஸ்தானில் இருப்பது அந்நாட்டு உயர்மட்ட விசாரணை ஆணையம் – மத்திய புலனாய்வு அமைப்பு வெளியிட்டுள்ள அறிக்கை மூலம் தெரிய வந்துள்ளது.

880 பக்கங்களை கொண்ட அந்த அறிக்கையில், 2008 பயங்கரவாத தாக்குதலில் பயன்படுத்தப்பட்ட அல்பவுஸ் படகு வாங்குவதில் ஈடுபட்டிருந்த முல்தானின் முஹம்மது அம்ஜத் கான் உள்பட 1,210 தேடப்படும் பயங்கரவாதிகளின் விவரங்கள் இடம்பெற்று உள்ளன

அம்ஜத், ஒரு யமஹா மோட்டோர் படகு இயந்திரம், லைப் ஜாக்கெட்டுகள், கராச்சியிலிருந்து  படகுகள் ஆகியவற்றை வாங்கி, மும்பை தாக்குதல்களில் பயன்படுத்தியுள்ளார்.
பயங்கரவாதிகள் பயன்படுத்திய அல்-ஹுசைனி மற்றும் அல்பவுஸ் படகின் கேப்டனாக இருந்த பஹவல்பூரைச் சேர்ந்த ஷாஹித் கபூர் என்பது போன்றவை குறிப்பிடப்பட்டுள்ளது.

மும்பை பயங்கரவாத தாக்குதலில் பயன்படுத்தப்பட்ட படகுகளில் வந்த  9 பணியாளர்களையும் இந்த பட்டியலில் குறிப்பிடப்பட்டுள்ளது. சாஹிவால் மாவட்டத்தைச் சேர்ந்த முஹம்மது உஸ்மான், லாகூர் மாவட்டத்தைச் சேர்ந்த அதீக்-உர்-ரெஹ்மான், ஹபீசாபாத்தைச் சேர்ந்த ரியாஸ் அகமது, குஜ்ரான்வாலா மாவட்டத்தைச் சேர்ந்த முகமது முஷ்தாக், தேரா காசி கான் மாவட்டத்தைச் சேர்ந்த முஹம்மது நயீம், சர்கோதா மாவட்டத்தைச் சேர்ந்த அப்துல் ஷகூர், முஹம்மது சபீர் லோத்ரான் மாவட்டம், ரஹீம் யார்கான் மாவட்டத்தைச் சேர்ந்த ஷாகில் அகமது ஆகியோர் அடங்குவர் இவர்கள் அனைவரும் ஐ.நா. பட்டியலிடப்பட்ட பயங்கரவாதக் குழுவில் உள்ளனர்.

மும்பையில்  கடந்த 2008ம் ஆண்டு நவம்பர் 26ந்தேதி கடல் மார்க்கமாக நுழைந்த பாகிஸ்தானை சேர்ந்த 10 பயங்கரவாதிகள் அதிரடி தாக்குதல் நடத்தினர்.  இதில் போலீசார், பொதுமக்கள் மற்றும் வெளிநாட்டினர் உள்பட 166 பேர் பலியானார்கள். 300க்கும் மேற்பட்டோர் காயமடைந்தனர்.

இந்த தாக்குதலில் ஈடுபட்ட பயங்கரவாதி அஜ்மல் கசாப் தவிர மற்ற 9 பயங்கரவாதிகளும் கொல்லப்பட்டனர். உயிருடன் பிடிப்பட்ட பயங்கரவாதியான, பாகிஸ்தானின் பரீத்கோட் நகரை சேர்ந்த அஜ்மல் அமீர் கசாப் கடந்த 2012ம் ஆண்டு நவம்பர் 21ந்தேதி தூக்கிலிடப்பட்டது குறிப்பிடத்தக்கது.