ஒப்புதல் அளித்தால் மட்டுமே மருத்துவ கலந்தாய்வு நடத்தப்படும் என ஆளுநரிடம் அறிவிப்பு – அமைச்சர் ஜெயக்குமார் தகவல்

அரசுப்பள்ளி மாணவர்களுக்கு 7.5 ஒதுக்கீடு வழங்கும் மசோதாவிற்கு ஒப்புதல் அளித்தால் மட்டுமே மருத்துவ கலந்தாய்வு நடத்தப்படும் என்று ஆளுநரிடம் அறிவித்துள்ளதாக அமைச்சர் ஜெயக்குமார் தகவல் தெரிவித்துள்ளார்.

ஆளுநருடன் அமைச்சர்கள் சந்திப்பு
மருத்துவ படிப்பில் அரசுப்பள்ளி மாணவர்களுக்கு 7.5 சதவீத இடஒதுக்கீடு வழங்க்கோரும் மசோதாவிற்கு ஒப்புதல் வழங்க வேண்டும் என்று தமிழக அமைச்சர்கள் 5 பேர் இன்று ஆளுநர் பன்வாரிலால் புரோகித்தை நேரில் சந்தித்து பேசினர். பின்னர், நிருபர்களுக்கு பேட்டி அளித்த அமைச்சர் ஜெயக்குமார் கூறியதாவது:-
7.5 சதவீத ஒதுக்கீடு
அரசுப் பள்ளியில் படிக்கும் மாணவ, மாணவிகள் மருத்துவர்களாக உருவாகிட வேண்டும் என்கிற உயரிய நோக்கத்தில், 7.5 சதவீத உள் ஒதுக்கீடு வழங்கினால் மட்டுமே சாத்தியம் என்கிற எண்ணத்தில் முதல்வர் முயற்சியால் சட்டப்பேரவையில் மசோதா நிறைவேற்றப்பட்டு அதற்கு ஒப்புதல் அளிக்க ஆளுநருக்கு அனுப்பப்பட்டது.

அது சட்டமாக்கப்படும்போது அரசுப் பள்ளியில் பயிலும் பெரும்பாலான மாணவர்கள் மருத்துவர்களாக உருவாக முடியும். எனவே, அதற்கு ஒப்புதல் கோரி அமைச்சர்கள் 5 பேர் இன்று ஆளுநரைச் சந்தித்து தமிழ்நாட்டில் நிலவுகின்ற சூழலைத் தெரிவித்தோம்.
ஒப்புதல்
கிராமப்புற, நகர்ப்புறத்தில் படிக்கின்ற மாணவர்களுக்கு 7.5 சதவீதம் உள் ஒதுக்கீடு வழங்கினால்தான் அவர்கள் மருத்துவர்களாக முடியும். இந்த நிலையில், 7.5% உள் ஒதுக்கீட்டுக்கு ஒப்புதல் கொடுத்தால் சிறப்பாக இருக்கும். தமிழகத்தில் கலந்தாய்வு உள்ள நிலையில் விரைவாக ஒப்புதல் வழங்க வேண்டும் என ஆளுநரிடம் கோரிக்கை வைத்தோம்.

சம்மதித்தால் மட்டுமே கலந்தாய்வு
நாங்கள் கூறியதைப் பொறுமையுடன் கேட்ட ஆளுநர், விரைந்து முடிவெடுக்கிறேன். என்னுடைய பரிசீலனையில் உள்ளது. விரைவில் அனுப்பி வைக்கிறேன் என்று தெரிவித்தார். அவர் அதில் திருத்தங்கள் எதையும் சொல்லவில்லை. முதல்வர் கோரிக்கையைத் தெரிவித்த பிறகு உடனடியாக விரைவில் முடிவெடுக்கிறேன் என்று ஆளுநர் தெரிவித்தார்.
தமிழகத்தில் கலந்தாய்வு நடக்காததையும், நீங்கள் ஒப்புதல் அளித்தால் மட்டுமே கலந்தாய்வு நடக்கும் என்பதையும் ஆளுநரிடம் கூறிவிட்டோம். அவர் கட்டாயம் பரிசீலிக்கிறேன் என்று கூறினார்.
இவ்வாறு அவர் கூறினார்.