ரூ.1,800 கோடி முதலீடுதான் வந்ததா? முதல்வரை சீண்டிய ஸ்டாலின்

முதலீடுகள் ஈர்க்கப்பட்டுள்ளதாகக் கூறிய முதல்வருக்கு திமுக தலைவர் ஸ்டாலின் கடும் கண்டனம் தெரிவித்துள்ளார்.

முதல்வர் எடப்பாடி பழனிசாமி அரசு நிகழ்வுகளில் பேசும்போது ஆயிரக்கணக்கான கோடி ரூபாய் முதலீடுகளை தமிழகத்திற்கு ஈர்த்துள்ளதாகவும், இதன்மூலம் பல ஆயிரம் வேலைவாய்ப்புகளை உருவாக்கி இருப்பதாகவும் புள்ளிவிவரங்களுடன் தொடர்ந்து கூறிவந்தார்.

இதனை விமர்சித்து அறிக்கை வெளியிட்டுள்ள திமுக தலைவர் ஸ்டாலின், நூற்றுக் கணக்கில் புரிந்துணர்வு ஒப்பந்தங்கள் போட்டு விட்டோம்; கோடிக் கணக்கில் முதலீடுகளை ஈர்த்து விட்டோம் என்று திரும்பத் திரும்பப் பொய்களையே சொல்லி, ஜம்பம் பேசி வந்த முதல்வர் பழனிசாமியின் முகமூடியை தி டைம்ஸ் ஆப் இந்தியா ஆங்கில நாளேடு கழற்றித் தரையில் வீசி விட்டது என விமர்சித்தார்.

அ.தி.மு.க. ஆட்சிக்கு வந்த பிறகு கடந்த 10 ஆண்டுகளில் அறிவிக்கப்பட்ட முதலீடான 1 லட்சத்து 90 ஆயிரம் கோடியில் பெற்றது வெறும் 9.4 சதவீதம் மட்டும்தான்; அதாவது வெறும் 18 ஆயிரத்து 188 கோடிதான் என்று அதில் சுட்டிக்காட்டியிருப்பதாக கூறினார் ஸ்டாலின். கடந்த பத்தாண்டு அதிமுக ஆட்சியில் பெற்ற முதலீடுகள், ஆண்டுக்கு 1800 கோடி ரூபாய்தான் என்பது வெட்ட வெளிச்சமாகி விட்டது எனவும் குறிப்பிட்டார்.

இரு உலக முதலீட்டாளர்கள் மாநாடு, முதலமைச்சர் மற்றும் அமைச்சர்கள் வெளிநாட்டிற்குக் கூட்டமாகப் படையெடுத்தது, உள்ளிட்ட நாடகங்களின் மூலமாக இதுவரை போட்ட புரிந்துணர்வு ஒப்பந்தங்கள் எல்லாம் வெத்து வேட்டு, எல்லாமே வீண் விளம்பரம் என்பது நிரூபணமாகி விட்டது.

read more: பொங்கல் பரிசை தடுக்க முயற்சிக்கிறது திமுக…குற்றம்சாட்டும் எடப்பாடி பழனிசாமி

கொரோனா காலத்திலும் தொழில் முதலீடுகளை ஈர்த்ததில் முதல் மாநிலம் என்று அரசுப் பணத்தில் அதாவது மக்களின் வரிப் பணத்தில், பத்திரிகைகளில் இன்று இரண்டு முழுப்பக்க விளம்பரம் கொடுத்துள்ள. பழனிசாமியின் சாயம் வெளுத்து விட்டது; வேடம் கலைந்து விட்டது என்றும் காட்டமாக சாடியுள்ளார் ஸ்டாலின்.