செஸ் ஒலிம்பியாட் பிரக்ஞானந்தா தலைமையிலான இந்திய பி அணி முதலிடம்

செஸ் ஒலிம்பியாட் போட்டியில் இந்திய பி அணி முதலிடத்தில் உள்ளது.

மாமல்லபுரத்தில் 44வது செஸ் ஒலிம்பியாட் போட்டிகள் ஜூலை 29ம் தேதி தொடங்கிய நிலையில் மிகச்சிறப்பாக நடைபெற்று வருகிறது. முதல் மூன்று நாட்கள் சிறப்பாக விளையாடி வந்த இந்தியாவின் ஆறு அணிகளும் நேற்று சற்று ஆட்டம் கண்டன. இந்திய சி அணி ஸ்பெயினிடம் 1,5 – 2,5 என்ற கணக்கில் தோற்றது. இந்திய ஏ அணி பிரான்ஸிடம் 2-2 என்ற கணக்கில் டிரா செய்தது.ஆனால் இந்திய பி அணி இத்தாலியை 3-1 என்ற கணக்கில் வீழ்த்தியது.

இதனையடுத்து ஓபன் பிரிவில் இந்தியா பி அணி புள்ளிகள் பட்டியலில் முதலிடத்தில் உள்ளது. இந்தியா ஏ அணி 7ம் இடத்திலும் இந்தியா சி அணி 20ம் இடத்திலும் உள்ளன. மகளிர் பிரிவில் (4சுற்றுகளுக்கு பிறகு) இந்தியா ஏ, இந்தியா பி உள்பட 8 அணிகள் அனைத்து ஆட்டங்களையும் வென்றுள்ளன. புள்ளிகள் பட்டியலில் இந்தியா ஏ அணி 4வது இடத்திலும் இந்தியா பி அணி 6ம் இடத்திலும், இந்தியா சி 28ம் இடத்திலும் உள்ளன.