சுவர் இடிந்து உயிரிழந்த இளைஞரின் குடும்பத்திற்கு 4 லட்சம் இழப்பீடு – முதல்வர் அறிவிப்பு

கன்னியாகுமரியில் சுவர் இடிந்து உயிரிழந்த இளைஞரின் குடும்பத்திற்கு 4 லட்சம் இழப்பீடு வழங்கப்படும் என்று முதல்வர் எடப்பாடி பழனிசாமி அறிவித்துள்ளார்.

இதுதொடர்பாக, தமிழக முதல்வர் எடப்பாடி பழனிசாமி இன்று விடுத்துள்ள அறிக்கையில் கூறியிருப்பதாவது,

கன்னியாகுமரி, அகஸ்தீஸ்வரம், நீண்டகரை-பி கிராமத்தில் கடந்த 8-ஆம் தேதி அன்று கடல் சீற்றத்தின் காரணமாக கடல் நீர் ஊருக்குள் புகுந்ததில் மரியதாஸ் என்பவருடைய வீட்டின் காம்பவுண்ட் சுவர் இடிந்து விழுந்து, அவருடைய மகன் பிரதீப் அஸ்வின் என்பவர் பலத்த காயமடைந்து மருத்துவமனைக்குச் செல்லும் வழியில் உயிரிழந்தார் என்ற செய்தியை அறிந்து நான் மிகுந்த வேதனையடைந்தேன்.

காம்பவுண்ட் சுவர் இடிந்து விழுந்ததில் உயிரிழந்த பிரதீப் அஸ்வின் குடும்பத்திற்கு எனது ஆழ்ந்த இரங்கலையும் அனுதாபத்தையும் தெரிவிக்கிறேன். இத்துயரச் சம்பவத்தில் லிஸ்டன் என்பவரது லிபின் மற்றும் விதுல் ஆகிய இருவரும் பலத்த காயமடைந்து மருத்துவமனையில் அனுமதிக்கப்பட்டுள்ளனர். இவர்கள் இருவரும் விரைவில் பூரண குணமடைந்து வீடு திரும்பவேண்டும் என்று இறைவனிடம் பிரார்த்திக்கிறேன். மேற்கண்ட சம்பவத்தில் உயிரிழந்த பிரதீப் அஸ்வின் குடும்பத்திற்கு 4 லட்சம் ரூபாய் மாநில பேரிடர் நிவாரண நிதியிலிருந்து வழங்க நான் உத்தரவிட்டுள்ளேன் என அவர் தெரிவித்துள்ளார்.