“ஆகஸ்டில் மழை குறைந்தது… செப்டம்பரிலும் நம்பிக்கை குறைவு; மேட்டூர் திறக்கப்படும் நாளில் வந்த IMD கணிப்பு

தென் தீபகற்ப இந்தியாவில் அடுத்த ஒரு வாரத்துக்கு மழைச் செயல்பாடு குறையும்; விவசாயம், நீர் இருப்புக்கு கூடுதல் கவனம் தேவை

புதுடெல்லி, செப்.1: தென்மேற்குப் பருவமழையின் கடைசி மாதமான செப்டம்பரிலும் நாடு முழுவதும் இயல்பைவிடக் குறைவான மழையே பதிவாக வாய்ப்புள்ளதாக இந்திய வானிலை ஆய்வு மையம் கணித்துள்ளது. ஆகஸ்ட் மாதத்தில் இந்தியா இயல்பைவிட 16 சதவீதத்துக்கும் அதிகமான மழைப் பற்றாக்குறையை சந்தித்த நிலையில், செப்டம்பர் மாதமும் பெரிய அளவில் பற்றாக்குறையை ஈடுசெய்ய வாய்ப்பில்லை என்பது புதிய கணிப்பின் முக்கிய அம்சமாகும்.

செப்டம்பரில் எவ்வளவு மழை?

செப்டம்பர் மாதத்தில் நாடு முழுவதும் கிடைக்கும் மழை, நீண்டகால சராசரியில் 91 சதவீதத்துக்கும் குறைவாக இருக்கக்கூடும் என்று வானிலை ஆய்வு மையம் கணித்துள்ளது. 90 முதல் 95 சதவீதத்துக்குள் பதிவாகும் மழை ‘இயல்பைவிடக் குறைவு’ என்றும், 90 சதவீதத்துக்கும் கீழே சென்றால் ‘பற்றாக்குறை’ என்றும் வகைப்படுத்தப்படுகிறது. இதனால் ஜூன் முதல் செப்டம்பர் வரையிலான ஒட்டுமொத்த தென்மேற்குப் பருவமழையும் பற்றாக்குறையுடனேயே முடிவடையும் சூழல் உருவாகியுள்ளது.

ஆகஸ்டில் 16.3% பற்றாக்குறை

ஆகஸ்ட் மாதத்தில் இந்தியாவில் பதிவான மழை இயல்பைவிட 16.3 சதவீதம் குறைவாக இருந்தது. ஜூலை இறுதியில் பருவமழைப் பற்றாக்குறை சுமார் 13 சதவீதமாக இருந்த நிலையில், ஆகஸ்ட் இறுதியில் ஒட்டுமொத்த பற்றாக்குறை சுமார் 14 சதவீதமாக அதிகரித்துள்ளது.

நாடு முழுவதும் கண்காணிக்கப்படும் 741 மாவட்டங்களில் 312 மாவட்டங்களில் மழைப் பற்றாக்குறையும், மேலும் 38 மாவட்டங்களில் கடுமையான பற்றாக்குறையும் பதிவாகியுள்ளது. அதாவது ஆகஸ்ட் இறுதியில் நாட்டின் ஏறத்தாழ பாதி மாவட்டங்களில் இயல்பான மழை கிடைக்கவில்லை.

காரணம் என்ன?

இந்த ஆண்டு தென்மேற்குப் பருவமழை இயல்பைவிடக் குறைவாக இருக்கலாம் என்று இந்திய வானிலை ஆய்வு மையம் முன்பே கணித்திருந்தது. மே மாதத்தில் வெளியிடப்பட்ட திருத்தப்பட்ட நீண்டகாலக் கணிப்பில், ஜூன்–செப்டம்பர் காலத்தில் நாடு முழுவதும் கிடைக்கும் மழை நீண்டகால சராசரியில் 90 சதவீதம் இருக்கலாம் என கணிக்கப்பட்டிருந்தது. இயல்பைவிடக் குறைவான அல்லது பற்றாக்குறையான மழைக்கான வாய்ப்பு 84 சதவீதம் என்றும் தெரிவிக்கப்பட்டிருந்தது.

பசிபிக் பெருங்கடலில் உருவாகியுள்ள எல் நினோ நிலை இந்தியப் பருவமழையைப் பாதிப்பதற்கான முக்கிய காரணங்களில் ஒன்றாக இருப்பதாக வானிலை ஆய்வு மையம் தெரிவித்துள்ளது.

தென் இந்தியாவுக்கு என்ன நிலை?

தமிழகத்தைப் பொறுத்தவரை இங்கே ஒரு முக்கியமான விஷயத்தைக் கவனிக்க வேண்டும். இந்திய வானிலை ஆய்வு மையத்தின் ஆகஸ்ட் 31 அறிவிப்பில், தென் தீபகற்ப இந்தியாவில் அடுத்த ஒரு வாரத்துக்கு மழைச் செயல்பாடு குறைந்தே காணப்படும் என்று தெரிவிக்கப்பட்டுள்ளது.

இந்திய வானிலை ஆய்வு மையத்தின் மழை மற்றும் பருவகாலக் கணிப்பு

ஆனால் இதை “தமிழகத்தில் செப்டம்பர் முழுவதும் மழை குறையும்” என்று பொருள்படுத்தக்கூடாது. செப்டம்பர் மாதத்திற்கான 91 சதவீதத்துக்கும் குறைவான மழை என்பது இந்தியா முழுவதற்குமான கணிப்பு.

தமிழகத்திற்கு இன்னொரு பருவமழை இருக்கிறது

தமிழகத்தைப் பொறுத்தவரை தென்மேற்குப் பருவமழை மட்டுமே முக்கிய நீராதாரம் அல்ல. அக்டோபர் முதல் டிசம்பர் வரையிலான வடகிழக்குப் பருவமழையே தமிழகத்தின் முக்கிய மழைக்காலமாகும். எனவே தற்போது வெளியாகியுள்ள செப்டம்பர் கணிப்பை வைத்தே தமிழகத்தின் இந்த ஆண்டுக்கான ஒட்டுமொத்த மழை அல்லது விவசாய நிலையை முடிவு செய்துவிட முடியாது.

அதேநேரத்தில் மேட்டூர் அணை இன்று திறக்கப்பட்டு, தற்போதைக்கு 45 நாட்களுக்குத் தண்ணீர் வழங்கத் திட்டமிடப்பட்டுள்ள சூழலில், காவிரிப் படுகை மழை, கர்நாடக அணைகளிலிருந்து வரும் நீர் மற்றும் அக்டோபரில் தொடங்கும் வடகிழக்குப் பருவமழை ஆகியவை டெல்டா விவசாயத்திற்கு முக்கியமானதாக இருக்கும்.

விவசாயத்தில் என்ன தாக்கம்?

மழைப் பற்றாக்குறை நீடித்தால் மழையை மட்டுமே நம்பியுள்ள சாகுபடிகளில் நீர் மேலாண்மை முக்கியமாகும். நீர் இருப்பு, நீர்மின் உற்பத்தி, குடிநீர் ஆதாரங்களிலும் பற்றாக்குறை அழுத்தத்தை ஏற்படுத்தலாம் என்று வானிலை ஆய்வு மையத்தின் பருவகாலக் கணிப்பே எச்சரித்துள்ளது.

இதனால் கிடைக்கும் நீரைச் சிக்கனமாகப் பயன்படுத்துதல், விவசாயத்திற்கான மாற்றுத் திட்டங்களைத் தயாராக வைத்திருத்தல் மற்றும் வறட்சிச் சூழலை தொடர்ந்து கண்காணித்தல் ஆகியவற்றை IMD பரிந்துரைத்துள்ளது.

126 ஆண்டுகளில் அதிக வெப்பமான ஆகஸ்ட்

மழைப் பற்றாக்குறையுடன் மற்றொரு குறிப்பிடத்தக்க வானிலைச் சாதனையும் பதிவாகியுள்ளது. 1901-க்குப் பிறகு இந்தியா சந்தித்த அதிக சராசரி வெப்பநிலை கொண்ட ஆகஸ்ட் மாதமாக ஆகஸ்ட் 2026 பதிவாகியுள்ளது. நாடு முழுவதற்குமான மாத சராசரி வெப்பநிலை 28.01 டிகிரி செல்சியஸாக இருந்தது. தென் தீபகற்ப இந்தியாவுக்கும் இது 1901-க்குப் பிறகு இரண்டாவது அதிக வெப்பமான ஆகஸ்ட் மாதமாக அமைந்துள்ளது.