தளபதியுடன் திரையில் மோதும் உலக நாயகன்?!

சன் பிக்சர்ஸ் தயாரிப்பில் நெல்சன் திலீப் குமார் இயக்கத்தில் தளபதி விஜய், பூஜா ஹெக்டே, செல்வராகவன், யோகிபாபு நடித்து வரும் திரைப்படம் பீஸ்ட். இத்திரைப்படத்தின் படப்பிடிப்பு இறுதிக்கட்டத்தை எட்டியுள்ளதாக கூறப்படுகிறது. பெரும் பொருட் செலவில் இத்திரைப்படம் உருவாகிறது.

இதன் முதல்கட்ட படப்பிடிப்பு கடந்த ஏப்ரல் மாதம் ஜார்ஜியாவில் தொடங்கியது. ஆனால் அங்கு படமாக்கி வந்தபோது கொரோனா தொற்று அதிகமாக பரவத் தொடங்கியதால், திட்டமிட்டபடி அனைத்து காட்சிகளையும் அங்கு படமாக்க முடியாமல் படக்குழு பாதியிலேயே தாயகம் திரும்பியது.

அதையடுத்து சென்னை, டெல்லி என்று படப்பிடிப்பு நடைபெற்று வந்த நிலையில் தற்போது சென்னையிலுள்ள கோகுலம் ஸ்டுடியோவில் படப்பிடிப்பு நடைபெற உள்ளது. அதற்காக பிரம்மாண்டமான அரங்கம் உருவாக்கப்பட்டுள்ளது. இதனையடுத்து தளபதி, வில்லனுடன் மோதும் சண்டைக் காட்சியை படமாக்க படப்பிடிப்பு தொடங்கிய ஜார்ஜியாவுக்கு படக்குழு மீண்டும் செல்லவுள்ளதாக தகவல்கள் வெளியாகி உள்ளது. இதற்காக விஜய் மீண்டும் ஜார்ஜியா பயணம் மேற்கொள்ளவுள்ளார்.

அதுபோன்று ராஜ்கமல் பிலிம்ஸ் தயாரிப்பில் லோகேஷ் கனகராஜ் இயக்கத்தில் கமல் ஹாசன் நடித்து வரும் படம் விக்ரம். விஜய் சேதுபதி, ஃபஹத் ஃபாசில், நரேன், காளிதாஸ் ஜெயராம் என்று பன்மொழிகளின் முன்ணனி நடிகர்கள் நடித்து வரும் திரைப்படம் இது.

கமல்ஹாசன் பிறந்தநாள் நெருங்குவதால் விக்ரம் படம் பற்றிய தகவல்கள் கூறுமாறு அவரது ரசிகர்கள் கேட்டு வந்தார்கள். இந்நிலையில் கமல்ஹாசன் கையில் துப்பாக்கியுடன் தீயாக இருக்கும் போஸ்டரை வெளியிட்டு விக்ரமின் உலகை நாளை மாலை 6 மணிக்கு காணலாம் என தனது டிவிட்டர் பக்கத்தில் தகவல் வெளியிட்டிருக்கிறார் இயக்குனர் லோகேஷ் கனகராஜ்.

விக்ரம் படம் 2022ம் ஆண்டு ஏப்ரல் மாதம் வெளியாகும் என்று லோகேஷ் தெரிவித்துள்ளார். அதே 2022ம் ஆண்டு ஏப்ரலில் தான் விஜய்யின் பீஸ்ட் படத்தை ரிலீஸ் செய்ய படக்குழுவினர் திட்டமிட்டுள்ளனர்.

விஜய் படத்துடன் லோகேஷ் கனகராஜின் படம் சேர்ந்து வருவது இது ஒன்றும் முதல் முறை அல்ல. முன்னதாக அட்லி இயக்கத்தில் தளபதி விஜய் நடிப்பில் 2019ஆம் ஆண்டு வெளியான பிகிலுடன், லோகேஷ் இயக்கத்தில் கார்த்தி நடிப்பில் கைதி வெளியானது.

இந்த நிலையில் விக்ரம் படம் ஏப்ரல் மாதம் என்பதை உறுதி செய்திருக்கிறார் இயக்குனர் லோகேஷ் கனகராஜ்.