கல்லூரிகளில் சேர ஆகஸ்டு 16 வரை கால அவகாசம் நீட்டிப்பு

சென்னை பல்கலைக்கழகத்திற்கு கீழ் உள்ள 130 கலை, அறிவியல் கல்லூரிகளில் சேர விண்ணப்பிக்கும் கால அவகாசத்தை நீட்டித்து சென்னை பல்கலைக்கழகம் உத்தரவிட்டுள்ளது.

இது தொடர்பாக சென்னை பல்கலைக்கழகம் வெளியிட்டுள்ள செய்திகுறிப்பில் கூறியிருப்பதாவது: சென்னை பல்கலைக்கழகத்தின் கட்டுப்பாட்டில் உள்ள கலை மற்றும் அறிவியல் கல்லூரிகளில் சேருவதற்கான கால அவகாசம் ஆகஸ்டு 16ம் தேதி வரை நீட்டிக்கப்பட்டுள்ளது. 130 இணைப்பு கல்லூரிகளில் பிஏ, பிஎஸ்சி, பி.காம், பிபிஏ, பிசிஏ உள்ளிட்ட படிப்புகளில் சேர ஆகஸ்டு 16ம் தேதி வரை விண்ணப்பிக்கலாம் என தெரிவித்துள்ளது.

அண்ணா பல்கலைக்கழகத்தின் கீழ் இயங்கும் கல்லூரிகளில் பொறியியல் படிப்புகளில் சேருவதற்கான கால அவகாசம் ஜூலை 27ம் தேதியுடன் முடிவடைந்த நிலையில், கடந்த ஆண்டை காட்டிலும் 35 ஆயிரத்திற்கும் அதிகமான மாணவர்கள் இந்த ஆண்டு விண்ணப்பித்துள்ளனர்.  இதேபோல், 163 அரசு கலை மற்றும் அறிவியல் கல்லூரிகளில் சேருவதற்கு இதுவரை 4 லட்சம் பேர் விண்ணப்பித்துள்ளனர். இந்த நிலையில், மாணவர்கள் சேர்க்கை இன்னும் அதிகரிக்கக் கூடும் என்பதால் சென்னை பல்கலைக்கழகம் கால அவகாசத்தை நீட்டித்துள்ளது.

-பா.ஈ.பரசுராமன்