செப்டம்பர் 5ம் தேதி கவுன்சிலிங் டிஎன்பிஎஸ்சி அறிவிப்பு

இந்துசமய அறநிலையத்துறையில் இஒ எனப்படும் செயல் அலுவலர் பதவிக்கான தேர்வில் தேர்ச்சி பெற்றவர்களுக்கு வரும் 5ம் தேதி பணி நியமன கவுன்சிலிங் நடைபெறும் என்று அறிவிக்கப்பட்டுள்ளது.

இதுதொடர்பாக டிஎன்பிஎஸ்சி வெளியிட்டுள்ள செய்திக்குறிப்பில் கூறியிருப்பதாவது: இந்து சமய அறநிலையத்துறையில் சார்நிலை பணிகளில் அடங்கிய செயல் அலுவலர் நிலை -1 பதவியில் உள்ள காலியிடங்களுக்கு இந்த ஆண்டு ஏப்ரல் 23ம் தேதி தேர்வு நடந்தது. இதில் தேர்ச்சி பெற்றவர்களுக்கு இம்மாதம் 18ம் தேதி நேர்முகத்தேர்வு நடந்தது.இதில் தேர்ச்சி பெற்றவர்களுக்கான பணி நியமன கவுன்சிலிங் வரும் 5ம் தேதி டிஎன்பிஎஸ்சி அலுவலகத்தில் நடைபெறவுள்ளது.இதற்கான தரவரிசைப் பட்டியல் www.tnpsc.gov.in என்ற இணையதளத்தில் வெளியிடப்பட்டுள்ளது.

பட்டியலில் உள்ளவர்கள் தங்களுக்கான கவுன்சிலிங் தேதி &நேரம் ஆகியவற்றிற்கான அழைப்பாணையை இணையதளத்தில் பதிவிறக்கம் செய்து கொள்ளலாம். குறிப்பிட்ட தேதியில் பங்கேற்காதவர்களுக்கு மறுவாய்ப்பு அளிக்கப்படாது. இவ்வாறு அதில் கூறப்பட்டுள்ளது.