மம்தாவை எதிர்த்து நிற்கும் பாஜக பெண் வேட்பாளர்!

மேற்கு வங்காள முதலமைச்சர் மம்தா பானர்ஜி அம்மாநிலத்தில் பவானிபூர் தொகுதியில் நடக்கும் சட்டமன்ற இடைத்தேர்தலில் போட்டியிடுகிறார். அதற்காக இன்று (செப்டம்பர் 10) அவர் வேட்பு மனு தாக்கல் செய்யவிருக்கிறார்.

கடந்த சட்டமன்றத் தேர்தலில் மம்தாவின் திரிணமூல் காங்கிரஸ் மூன்றாவது முறையாக வெற்றி பெற்று ஆட்சி அமைத்துள்ளது. இருப்பினும் முதலமைச்சரான மம்தா, நந்திகிராம் தொகுதியில் தன் கட்சியில் இருந்து பாஜகவுக்கு கட்சி தாவிய சுனந்து அதிகாரியிடம் குறைந்த வாக்கு வித்தியாசத்தில் தோல்வியடைந்தார். இந்நிலையில் முதல்வராக இருக்கும் மம்தா ஆறு மாதங்களுக்குள் சட்டமன்ற உறுப்பினர் ஆககேண்டும் என்பதால் அம்மாநில தலைமைச் செயலாளரின் வேண்டுகோளுக்கு இணங்க பவானிபூரில் இடைத்தேர்தல் அறிவித்துள்ளது தேர்தல் ஆணையம்.

நாடு தழுவிய அளவில் பாஜக எதிர்ப்புக் கூட்டணியை காங்கிரஸ் தலைவர் சோனியா காந்தி உருவாக்கி வருகிறார். அந்த காணொலி வாயிலாக நடைபெற்ற கூட்டத்தில் மம்தா பானர்ஜியும் கலந்துகொண்டார். இதனால் மம்தா பானர்ஜியை எதிர்த்து காங்கிரஸ் தனது வேட்பாளரை நிறுத்தவில்லை. ஆனால் மம்தாவுக்கு எதிராக தனது வேட்பாளரை பாஜக இன்று அறிவித்துள்ளது.

இந்த தேர்தலில் மேற்கு வங்க முதல்வர் மம்தா பானர்ஜிக்கு எதிராக பிரியங்கா திப்ரேவால் என்ற இளம் வழக்கறிஞரை நிறுத்துகிறது பாஜக. பிரியங்கா திப்ரேவால், 41 வயதான இவர் கல்கத்தா உயர்நீதிமன்ற மற்றும் உச்சநீதிமன்ற வழக்கறிஞர். மேற்கு வங்காள சட்டமன்றத்தேர்தலுக்கு பிந்தைய பெரும் வன்முறை தொடர்பான வழக்கில் அவர் நீதிமன்றத்தில் திரிணமூல் காங்கிரஸுக்கு எதிராக வாதாடி வருவது குறிப்பிடத்தக்கது.

2014ம் ஆண்டு பாரதிய ஜனதா கட்சியில் சேர்ந்த பிரியங்கா திப்ரேவால் தற்போது பாஜகவின் இளைஞர் பிரிவான யுவ மோர்ச்சாவில் துணைத் தலைவர் பதவி வகித்து வருகிறார்.