மாற்றுத்திறனாளிகளுக்கான கட்டணமில்லா பயண அட்டை-விவரம் வெளியீடு

மாநகர் போக்குவரத்து கழக மேலாண் இயக்குனர் மாற்றுத்திறனாளிகளுக்கான கட்டணமில்லா பயண அட்டையை அந்தந்த மாவட்ட மறுவாழ்வு அலுவலங்களில் பெற்றுக்கொள்ளலாம் என அறிவித்துள்ளார்.

சென்னை:

தமிழகத்தில் கொரோனா பரவல் காரணமாக கடந்த 5 மாதங்களாக பேருந்துகள் இயக்கப்படாமல் இருந்தது. அதன் பின்னர், மக்களின் நலனை கருத்தில் கொண்டு பேருந்துகளை இயக்க வேண்டும் என மக்கள் கோரிக்கை விடுத்தனர்.அதே போல பாதுகாப்புடன் பேருந்துகளை இயக்கலாம் என மருத்துவ நிபுணர்கள் குழுவும் பரிந்துரைத்தது. இதனை அடுத்து பேருந்துகளை இயக்க அரசு ஒப்புதல் அளித்து கடந்த 1 ம் தேதி முதல் மாவட்டங்களுக்குள் பேருந்துகள் இயக்கப்பட்டு வருகின்றன.

அதனை தொடர்ந்து வரும் 7 ம் தேதியில் இருந்து மாவட்டங்களுக்கு இடையேயான பேருந்துகள் இயக்கப்பட உள்ளன. ஊரடங்கு போடுவதற்கு முன்னர், கடந்த மார்ச் மாதம் பஸ் பாஸ் பெற்றவர்கள் அதனை வரும் 15 ம் தேதி வரை உபயோகித்துக் கொள்ளலாம் என்று தமிழக அரசு அறிவித்தது.

இந்த நிலையில், சென்னை மாநகர போக்குவரத்து கழகம் சார்பில் வழங்கப்பட்டுள்ள மாற்றுத்திறனாளிகளுக்கான கட்டணமில்லா பயண அட்டையை அந்தந்த மாவட்ட மறுவாழ்வு அலுவலகங்களில் பெற்றுக் கொள்ளலாம் என்று மாநகர் போக்குவரத்துக் கழக மேலாண் இயக்குனர் அறிவித்துள்ளார்.

சென்னை, செங்கல்பட்டு, திருவள்ளூர் மாவட்ட மறுவாழ்வு அலுவலகங்களை தொடர்பு கொண்டு பாஸ் பெற்று கொள்ளலாம் ,மேலும் விவரங்களுக்கு promtc123@gmail.com என்ற இணையத்தள முகவரி மற்றும் 044-2345 5801 என்ற எண்ணிற்கு தொடர்பு கொள்ளலாம் என தெரிவிக்கப்பட்டுள்ளது.