உயர் அதிகாரி உத்தரவிட்டால் கொலை செய்வீங்களா?… லெப்ட் – ரைட் வாங்கிய நீதிமன்றம்!

உயர் அதிகாரி உத்தரவிட்டால் கொலை செய்வீர்களா என சஸ்பெண்ட் செய்யப்பட்ட எஸ்.பி.-க்கு கேள்வி எழுப்பியுள்ள சென்னை உயர் நீதிமன்றம், கண்ணியமாக நடத்தப்பட வேண்டிய பெண்கள் காவல்துறையிலேயே அவ்வாறு நடத்தப்படாதது அவமானகரமானது என அதிருப்தி தெரிவித்துள்ளது.

தமிழக சட்டம் ஒழுங்கு சிறப்பு டிஜிபி கடந்த பிப்ரவரி மாதம் பெண் ஐ.பி.எஸ். அதிகாரியிடம் பாலியல் அத்துமீறலில் ஈடுபட்டதாக அளிக்கப்பட்ட புகாரை தொடர்ந்து, சிறப்பு டிஜிபியும் (ராஜேஷ் தாஸ்), பெண் எஸ்.பி. சென்னைக்கு வரவிடாமல் தடுத்த செங்கல்பட்டு எஸ்.பி. (டி. கண்ணன்) ஆகிய இருவரும் சஸ்பெண்ட் செய்யப்பட்டனர்.

புகார் குறித்து விசாரிக்க, கூடுதல் தலைமைச் செயலாளர் தலைமையில் 6 பேர் கொண்ட உட்புகார் விசாரணைக் குழு எனப்படும் விசாகா கமிட்டி அமைக்கப்பட்டு, அந்த குழு அரசுக்கு அறிக்கை தாக்கல் செய்துள்ளது. சிபிசிஐடி போலீசாரும் வழக்கு பதிவு செய்து விசாரித்து வருகின்றனர்.

தன் மீது குற்றம்சாட்டப்பட்ட சம்பவம் பயணத்தின் போது நடந்துள்ளதாகக் கூறப்படுவதால், வழக்கை கள்ளக்குறிச்சி அல்லது செங்கல்பட்டு நீதிமன்றங்களில் தான் விசாரிக்க வேண்டும் எனவும், விழுப்புரம் நீதிமன்றம் விசாரிக்க அதிகாரமில்லை என தாக்கல் செய்த மனுவை விழுப்புரம் நீதிமன்றம் தள்ளுபடி செய்ததை எதிர்த்து சிறப்பு டிஜிபி உயர் நீதிமன்றத்தில் வழக்கு தொடர்ந்துள்ளார்.

இந்த வழக்கில் இருந்து தன்னை விடுவிக்க மறுத்த விழுப்புரம் நீதிமன்ற உத்தரவை ரத்து செய்ய கோரி சஸ்பெண்ட் செய்யப்பட்ட செங்கல்பட்டு எஸ்.பி. உயர் நீதிமன்றத்தில்
வழக்கு தொடர்ந்துள்ளார். இந்த இரு வழக்குகளும் நீதிபதி பி. வேல்முருகன் முன்பு விசாரணைக்கு வந்தபோது, சஸ்பெண்ட் செய்யப்பட்ட எஸ்.பி. தரப்பில் உயர் அதிகாரி என்ற முறையில் கூடுதல் டிஜிபி அறிவுறுத்தலின்படியே தான் செயல்பட்டதாக வாதிடப்பட்டது.

அப்போது நீதிபதி வேல்முருகன் குறுக்கிட்டு பெண்கள் கண்ணியத்துடன் நடத்தப்பட வேண்டுமெனவும், காவல்துறையிலேயே அவ்வாறு நடத்தப்படாதது அவமானகரமானது என தெரிவித்தார். காவல்துறையை கடவுள்தான் காப்பாற்ற வேண்டுமென தெரிவித்ததுடன், உயர் அதிகாரி கொலை செய்யச் சொன்னால் செய்வீர்களா என கேள்வி எழுப்பிதுடன், உயர் அதிகாரிகளே இதுபோன்ற குற்றச்சாட்டுகளுக்கு ஆளானால் காவல்துறை மீது பொதுமக்களுக்கு எப்படி நம்பிக்கை இருக்கும் எனவும் கேள்வி எழுப்பினார்.

இதையடுத்து வழக்கை வாபஸ்பெறுவதாக எஸ்.பி. கண்ணன் தரப்பில் தெரிவிக்கப்பட்டதை அடுத்து வழக்கு தள்ளுபடி செய்து நீதிபதி உத்தரவிட்டார். மேலும் விழுப்புரம் நீதிமன்ற வழக்கு விசாரணையை 3 மாதத்தில் முடிக்கவும் உத்தரவிட்டுள்ளார். விசாரணை நீதிமன்றத்தை மாற்றக்கோரி சிறப்பு டிஜிபி தாக்கல் செய்த மனு மீதான தீர்ப்பை தேதி குறிப்பிடாமல் தள்ளிவைத்துள்ளார்.

இதற்கிடையில், விசாகா குழுவில் இடம் பெற்றுள்ள கூடுதல் டிஜிபி சீமா அகர்வால், ஐ ஜி அருண் ஆகியோர் தனக்கு எதிராக ஒருதலைபட்சமாக செயல்படுவர் என்பதால் இருவரையும் நீக்க கோரி உள்துறை செயலருக்கு மனு அளித்ததாகவும், இந்த மனு பரிசீலிக்கப்படும் முன்பே விசாரணை துவங்கி விட்டதாகவும் குற்றம்சாட்டி, அதன் விசாரணைக்கு தடைகோரி சஸ்பெண்ட் ஆன சிறப்பு டிஜிபி உயர் நீதிமன்றத்தில் மற்றொரு வழக்கு தொடர்ந்துள்ளார். குழு விசாரணையை முடித்த 10 நாட்களில் தனக்கு அளிக்கப்பட வேண்டிய அறிக்கை இன்னும் வழங்கப்படவில்லை என்றும் மனுவில் குறிப்பிட்டிருந்தார். இந்த மனுவை விசாரித்த நீதிபதி சி.சரவணன், மனு குறித்து தமிழக அரசு பதிலளிக்க உத்தரவிட்டு வழக்கு விசாரணையை அக்டோபர் 22ஆம் தேதிக்கு உத்தரவிட்டுள்ளார்.