வாக்குறுதியை நிறைவேற்றவில்லை என்றால் ராஜினாமா செய்துவிடுவோம்: கமல்ஹாசன் அறிவிப்பு

வாக்குறுதியை நிறைவேற்றவில்லை என்றால் மக்கள் நீதி மய்யத்தின் எம்.எல்.ஏ.க்கள் ராஜினாமா செய்வார்கள் என கமல்ஹாசன் கூறியுள்ளார்.

மக்கள் நீதி மய்யம் தலைவர் கமல்ஹாசன் சட்டமன்றத் தேர்தலை எதிர்கொள்வதற்கான பணிகளை முடுக்கிவிட்டுள்ளார். டிசம்பர் 13ஆம் தேதியே பிரச்சாரத்தை ஆரம்பித்து தற்போது மேற்கு மாவட்டங்களில் பிரச்சாரம் செய்கிறார். இல்லத்தரசிகளுக்கு ஊதியம், வீடுதோறும் இணையம், டிரில்லியன் பொருளாதாரமாக உயர்த்துவது உள்ளிட்ட பல்வேறு வாக்குறுதிகளையும் அளித்து வருகிறார்.

தருமபுரி, கிருஷ்ணகிரி மாவட்டங்களில் கமல்ஹாசன் பிரச்சாரம் செய்தார். பாப்பாரப்பட்டியில் கூடியிருந்த மக்கள் மத்தியில் பேசிய கமல், சினிமாக்காரனுக்கு கூடும் கூட்டமெல்லாம் ஓட்டாக மாறாது என்று பேசுகிறார்கள். அதை நிராகரித்துக் காட்டுங்கள். நான் இங்கு பார்க்கும் முகங்கள் எல்லாம் நாளை நமதே, நாளை நமதே என்று சொல்கிறது என்றார்.

இது இளைஞர்களின், மகளிரின் கட்சி. மாண்புமிகு என்ற பெயருக்காக அரசியலுக்கு வரவில்லை. மக்கள் ஊழியர்கள் என்ற அடிப்படையிலேயே வந்திருக்கிறோம் என்று கூறினார்.

read more: ஜனவரி 29 கூடும் நாடாளுமன்றம்: எதிர்க்கட்சிகள் திட்டம் என்ன?

மேலும், “நாங்கள் அறிவிக்கும் வேட்பாளரை நீங்கள் வெற்றிபெறச் செய்த பின்னர், அவர் கொடுத்த வாக்குறுதிகளை நிறைவேற்ற தாமதப்படுத்தினால் அல்லது நிறைவேற்றாவிட்டால் அவரின் ராஜினாமா கடிதம் என்னிடம் இருக்கிறது. அவர்கள் ராஜினாமா செய்வார்கள்” எனவும் வாக்குறுதி அளித்தார்.